હોસ્પિટલ પણ મહિલા તબીબ માટે સલામત ન હોય ત્યારે...

સમાન તક-સમાન હક માગવા માટે સ્ત્રીની મજાક ઉડાડતાં પહેલાં એને સુરક્ષિત માહોલ તો આપો.

- ડૉ. મિતાલી સમોવા

કોઈ પણ સમજુ વ્યક્તિ દરેક ક્ષેત્રમાં દરેક સ્તરે સ્ત્રી-પુરુષ-અન્ય વચ્ચે વ્યવહાર–તકોની સમાનતાની વાત કરે છે ત્યારે અબુધ કહી શકાય એવા કેટલાક લોકો આપણી સામાજિક વ્યવસ્થા સમજ્યા વગર અને પોતે જે બોલે છે એની અસર-આડઅસર જાણ્યા વિના એવો વિરોધ કરતા હોય છે કે એટલી બધી સમાનતા જોઈએ છે તો આર્મી, ખાણકામ, મોટાં બિલ્ડિંગનાં કામોમાં કે અન્ય જોખમી સ્થાને સ્ત્રી કેમ સમાન ભાગીદારી માગતી નથી?

એનાં પ્રાથમિક કારણોમાં એક છે કે આ બધાં મસલપાવર ધરાવતાં ક્ષેત્રોમાં પુરુષોનું સેંકડો વર્ષોથી એકહથ્થુ વર્ચસ રહ્યું છે. એવી અનેક જગ્યાએ સ્ત્રીને પ્રવેશ અપાતો જ નથી. આજથી સો-બસ્સો વર્ષ પહેલાં સ્ત્રી ડૉક્ટર-એન્જિનિયર બનવા માટે પણ લાયક ગણાતી નહોતી. બીજું, ભારે કામ કરનારી સ્ત્રીને ભાયડાછાપ કે જોરુકી તરીકે ઓળખાવવામાં આવે છે અને અમુક પુરુષો એને પત્નીપ્રેમિકા તરીકે પસંદ કરતા નથી. બાકી, ઈંટવાડા અને બિલ્ડિંગ પર મહિલા મજૂરો સવાયું કામ કરે જ છે.