શાસ્ત્રીય નૃત્યગતનો ઝળહળતો સિતારો...

દેશ-વિદેશમાં ઈન્ડિયન ક્લાસિક ડાન્સને ચમકાવનારાં આ નૃત્યાંગનાએ એક તબક્કે ક્ષેત્રસંન્યાસ લેવાનો નિર્ણય લઈ લીધેલો... સામે આવેલા પડકારોનો સામનો કરી આજે એક ઊંચાઈએ પહોંચનારાં આ નૃત્યાંગનાનું જીવન પ્રેરણાદાયી છે.

- અરવિંદ ગોંડલિયા

બોલો, સુરતની આ કન્યાનાં લગ્ન ૧૪ વર્ષની વયે જ થઈ ગયાં છે. ના ના, બાળલગ્નની કુપ્રથાની વાત નથી. હકીકતમાં એ કન્યાનો ભરથાર છે ભરતનાટ્યમ્. બાકી, સમાજે નક્કી કરેલી લગ્નની વ્યાખ્યાનો તો એ વિચાર પણ નથી કરી રહી.

એનું નામઃ જુગનુ કાપડિયા. ગુજરાત ગૌરવ યુવા પુરસ્કારથી સમ્માનિત જુગનુબહેનનો શ્વાસ જ શાસ્ત્રીય નૃત્ય છે. સુરતમાં જન્મેલી જુગનુ ઘરઘર, સંતાકૂકડી, ચલક ચલાણું જેવી રમત સાથે મોટી થઈ. પિતા કિરણભાઈ સુરત પીપલ્સ બૅન્કમાં નોકરી કરે અને માતા કિશોરીબહેન ગૃહિણી. જુગનુ એમનું એકમાત્ર સંતાન એટલે એની પર વહાલનો વરસાદ બારેમાસ વરસે. દરેક દીકરીને પિતા માટે સહેજ વધુ લાગણી હોય છે. અહીં પણ એવું જ. એ કહે છે: ‘મને ભગવાન સ્વરૂપે માતા-પિતા મળ્યાં, એમને છોડીને જવા હું તૈયાર નહોતી એટલે લગ્ન ન કરવા પાછળનું આ એક કારણ. વળી, લગ્ન બાદ માતા-પિતાથી દૂર રહેવું પડે અને નૃત્યસાધના સાથે બાંધછોડ થાય એ મંજૂર નથી.’

એ સ્વભાવે શાંત, શરમાળ અને અંતર્મુખી જુગનુના પગ નૃત્ય ક્ષેત્રે કેવી રીતે થીરકતા થયા એ વિશે જણાવતાં એ કહે છે: ૧૪ વર્ષની વયે ત્યારે મમ્મીની ઈચ્છાથી ડાન્સ ક્લાસ જોઈન કર્યા ને આનંદ આવવા લાગ્યો. જો કે પણ શીખતી હતી, આજે પણ હું શીખી જ રહી છું. નૃત્ય તો શીખવાની એક અનંત યાત્રા છે.’

જો કે વધારે ઊંડાણમાં જતાં એક રોમાંચક હકીકત સામે આવે છે કે દશેરાના દિવસે જુગનુનો જન્મ થયો ત્યારે હૉસ્પિટલના પ્રાંગણમાં ગરબાની રમઝટ ચાલતી હતી. નવરાત્રિના ગરબા ગર્ભમાં સાંભળતાં સાંભળતાં એનો જન્મ થયો. એનું નામ પાડનાર મામા અને પત્રકાર ચંદ્રવદન ઝવેરીએ તો નવજાત બાળકીના પગની ગતિ જોઈને ભવિષ્ય ભાખ્યું કે આ જરૂર ડાન્સ કરશે. વળી, ફુગનુ એટલે રાત્રિપ્રકાશમાં ઝગમગતા આગિયા.