સત્સંગ સાથે જોડાઈ છે સેવા...

ધર્મ જીવનની ગુણવત્તા સુધારવાનો માર્ગ છે.

તાજેતરમાં જ પર્યુષણ પર્વની દેશભરમાં ઉજવણી થઈ. પર્યુષણ એટલે આજના અત્યંત વ્યસ્ત જીવનમાં સ્વયંને મળવાનો વિશ્રાંતિરૂપ સમય. એમાંય પૂજ્ય ગુરુદેવશ્રી રાકેશજીની પ્રશાંત નિશ્રામાં પર્યુષણ પર્વના આઠ દિવસ વિતાવો તો બીજું જોઈએ જ શું!

શ્રીમદ્ રાજચંદ્ર મિશન, ધરમપુર (SRMD) દ્વારા મુંબઈના વરલીસ્થિત વિશાળ એનએસસીઆઈ ડોમમાં આયોજિત પર્યુષણ પર્વની આ અષ્ટદિવસીય ઉજવણીઓમાં દેશ-વિદેશથી હજારો મુમુક્ષુ પ્રત્યક્ષ તેમ જ ઑનલાઈન જોડાયા હતા. અહીં ઉત્સવનું ઊંડાણ જ નોખું હતું. સવારની સ્નાત્રપૂજા અને સાંજની વિવિધ ભક્તિમય પ્રસ્તુતિઓ, જેમ કે જૈન ધર્મ કા યશોગાન નાટ્યપ્રયોગ, સહુને ગહન શાંતિમાં દોરી જનાર સાઉન્ડબાથ અને કૅન્ડલલાઈટ મેડિટેશન અને શ્રી મહાવીર જન્મની ભવ્ય ઉજવણીઓએ ભવ્ય વાતાવરણ સર્જ્યું હતું.