પાણી ભલે ઓસરી ગયાં, પૂરની અસર વડોદરાની દિવાળી બગાડશે...

અતિ ભારે વરસાદ અને ઉપરવાસમાં જમા થયેલું પાણી છોડવામાં થયેલી ક્ષતિએ વડોદરાને ડુબાડ્યું હતું. આટલા દિવસો પછી હજી અત્યારે પણ એનાં પરિણામ દેખાઈ રહ્યાં છે ખાલીખમ બજાર રૂપે.

- નિતુલ ગજ્જર (વડોદરા)

જે શહેરનો નવરાત્રિનો ઉત્સાહ જગવિખ્યાત છે ત્યાંની નવરાત્રિ તો આ વર્ષે ઝાંખી જ રહી. જ્યાં દર વર્ષે નવરાત્રિથી લઈ દિવાળીના દિવસો સુધી પગ મૂકવાની જગ્યા ન હોય એ બજારોના રસ્તા ખાલી પડ્યા છે. જ્યાં દુકાનદાર સાંજ પડ્યે બોલી બોલીને થાકી જતા હોય એ દુકાનોમાં આ વર્ષે બોણી થતાં સાંજ પડી જાય છે.

આ પરિસ્થિતિ ગુજરાતના કલ્ચરલ કૅપિટલ વડોદરાની છે. આ ચોમાસા દરમિયાન વડોદરામાં ભારે વરસાદને કારણે ઉપરા ઉપરી ત્રણ વખત પૂરની સ્થિતિ ઊભી થતાં હજારો લોકોના માલસામાન સાથે શહેરનો ઉત્સાહ પણ ધોવાઈ ગયો છે.

ગુજરાતના ઘણાખરા વિસ્તારો માટે આ વર્ષનું ચોમાસું બહુ ભારે રહ્યું, જેના પગલે રાજ્યમાં ઠેર ઠેર પાણી ભરાયાં હતાં. એમાં પણ વડોદરામાં તો આ વર્ષે વરસાદે માઝા મૂકી.

જુલાઈના છેલ્લા સપ્તાહ દરમિયાન વડોદરામાં જાણે બારે મેઘ ખાંગા થયા અને આખું શહેર પાણી. પાણી થઈ ગયું. કામધંધે ગયેલા લોકો માંડ માંડ જીવના જોખમે પોતાના ઘરે પહોંચી શક્યા. ત્યાર બાદ જન્માષ્ટમીના દિવસે ફરી એક વાર મેહુલિયો ત્રાટક્યો. એ વખતે તો ગુજરાતભરમાં ભારે વરસાદ હતો એટલે દરેક શહેરની સ્થિતિ લગભગ એકસરખી હતી. જો કે વળતા દિવસે વડોદરાના જિલ્લા પ્રશાસને ડેમમાંથી આડેધડ પાણી છોડતાં આખું શહેર પાણીમાં ડૂબ્યું. અનેક લોકોનાં ઘરમાં આઠ-દસ ફૂટ સુધી પાણી ભરાતાં સેંકડો લોકો પોતાનો જીવ બચાવવા જે હાથમાં લાગ્યું એ લઈ અગાશી માથે ચડી ગયા. વડોદરામાં ચાર દિવસ આ જ હાલત રહી. એક દિવસ તો વડોદરાના પૂર્વ અને પશ્ચિમ બન્ને વિસ્તાર વચ્ચે સુદ્ધાં સંપર્ક કપાઈ ગયો હતો. શહેરમાં આવવાના તમામ રસ્તા સુધી પહોંચવું પણ લગભગ અશક્ય બન્યું હતું.

વિશ્વામિત્રી નદીના પટમાં જ થયેલાં ગેરકાયદે બાંધકામને કારણે પાણીનો પ્રવાહ અવરોધાયો એ પણ પૂરનું મહત્ત્વનું કારણ હતું.