ટ્રમ્પના વિજયનું ભારત કનેક્શન જાણવા જેવું છે.

રસાકસીની ધારણાવાળી અમેરિકન પ્રમુખપદની ચૂંટણીમાં ભૂતપૂર્વ પ્રમુખ ડોનાલ્ડ ટ્રમ્પે એકતરફી જીત મેળવીને વિશ્વઆખાને સ્તબ્ધ કરી દીધું. ટ્રમ્પના આ ભવ્ય વિજય પાછળ ઘણા ઈન્ડિયન અમેરિકન્સની પણ મહેનત છે. હવે એમના પ્રધાનમંડળમાં ભારતીય કે હિંદુ કનેક્શન્સ ધરાવતા રાજકારણીઓને સ્થાન મળશે કે નહીં એની ચર્ચા છે.

- સમીર પાલેજા (મુંબઈ)

ન્યુ યોર્કના જેએફકે ઍરપોર્ટ પર ફરજ બજાવતા એક ઈન્ડિયન અમેરિકન ઉચ્ચાધિકારી ત્યાંના રાજકીય પ્રવાહો પર ચાંપતી નજર રાખે છે. અમેરિકાની ડેમોક્રેટિક તથા રિપબ્લિકન પાર્ટીના ઘણા રાજકારણીઓ સાથે એમને ઘરોબો છે. તાજેતરમાં સંપન્ન થયેલી અમેરિકાના પ્રમુખપદની ચૂંટણીમાં ભારતીયોની ભૂમિકા કેવી રહી એ વિશે આ અધિકારી નામ ન આપવાની શરતે ચિત્રલેખાને કહે છેઃ ‘વર્ષોથી ડેમોક્રેટિક પાર્ટીના સપોર્ટમાં રહેલા ભારતીયો-હિંદુઓ પાછલાં ચાર વર્ષમાં જો બાઈડન-કમલા હેરિસે ગેરકાયદે વસાહતીઓ પ્રત્યે દર્શાવેલા કૂણા વલણથી એટલા નાખુશ હતા કે એમણે આ વખતે ટ્રમ્પને કચકચાવીને મત આપ્યા. ઘણાને તો ટ્રમ્પની નીતિઓમાં મોદીના રાષ્ટ્રવાદનાં દર્શન પણ થતાં હતાં.'

એ ઉમેરે છે કે કમલા હેરિસનું હિંદુવિરોધી માનસ તથા ખાલિસ્તાનીઓ પ્રત્યે હળવી લાગણી ભારતીય સમુદાયને પસંદ નહોતી. કમલા પ્રમુખ બનશે તો ખરી સત્તા ઓબામા-હિલેરી ક્લિન્ટન જેવાં ગ્લોબલિસ્ટો પાસે જ રહેશે એ અમેરિકાના ભારતીય મતદારો સમજી ગયેલા.

એક પૉઈન્ટ નોટ કરજો કે અમેરિકામાં ભારતીય મૂળના બાવન લાખ લોકોમાંથી ૨૬ લાખ નોંધાયેલા મતદારો છે. આ ચૂંટણીમાં ટ્રમ્પે હિંદુઓની તરફેણમાં પોસ્ટ મૂકેલી તો કમલા હેરિસે દિવાળીમાં ફૂલઝડી ફેરવતો વિડિયો મૂકીને હિંદુ-ભારતીયોને રીઝવવાનો પ્રયાસ કરેલો. કમલાની ડેમોક્રેટિક પાર્ટીએ તો સ્વિંગ સ્ટેટ્સમાં દેશીઝ ડિસાઈડ એવું કૅમ્પેઈન કરેલું. જાણીતી શેફ પદ્મા લક્ષ્મી (સલમાન રશદીની ભૂતપૂર્વ પત્ની)એ ઘરે ઘરે જઈને કમલા હેરિસ માટે પ્રચાર કરેલો. તેમ છતાં થોડા મહિના પહેલાં થયેલા સર્વેમાં ઈન્ડિયન અમેરિકન મતદારો ટ્રમ્પ તરફ ઝૂક્યા હોવાનું જણાયું હતું.

ઈન્ડિયન અમેરિકન મતદારો ઉપરાંત દ્વિતીય પંક્તિના દેશી નેતાઓ પણ ઘણા સક્રિય હતા. પ્રશાંત રેડ્ડી અને રાજેશ મોહન જેવા રિપબ્લિકન નેતાઓએ ટ્રમ્પના પ્રચારમાં ખૂબ પસીનો વહાવ્યો. એ જ રીતે, આ વખતે ઘણા ભારતીય મૂળના અમેરિકન ઉદ્યોગપતિઓએ પણ ટ્રમ્પ માટે પ્રચારભંડોળ ઉઘરાવેલું. ક્વાન્ટ એઆઈના સીઈઓ જિતેન અગ્રવાલ એમાં અગ્રસર હતા. એ જ રીતે રિપબ્લિકન હિંદુ કોઈલેશનના હેડ શલભ કુમારે પણ ખાસ્સા પૈસા એકત્ર કરેલા. એમણે સ્વિંગ સ્ટેટ (ગમે એના પક્ષે ઝૂકવાની સંભાવના ધરાવતા) ગણાતા પેન્સિલ્વેનિયા, વિસ્કોન્સિન અને મિશિગન પર વિશેષ ધ્યાન આપેલું.