આખેઆખા દેશનું અસ્તિત્વ જ મટી જાય તો? જ

સાવધાન... જન્મદર ઘટવાને કારણે દક્ષિણ કોરિયા નામશેષ થવાના આરે આવી પહોંચ્યો છે. આમ થવાનાં કારણ વિચારવા જેવાં છે.

- નિતુલ ગજ્જર (વડોદરા)

પળવાર માટે કલ્પના કરોઃ જે દેશે સૌપ્રથમ વાર કૉલેજ તથા હૉસ્ટેલમાં છોકરા-છોકરી એકસાથે રહી શકે અને છોકરા કરતાં છોકરીને વહેલી નિશાળે બેસાડવા જેવા સામાજિક દૃષ્ટિએ પ્રગતિશીલ ગણાય એવા નિર્ણય અમલમાં મૂક્યા, જે દેશને કારણે દુનિયાને સેમસંગ, એલજી, હુન્ડેઈ, કિઆ જેવી બ્રાન્ડ મળી, જે દેશનું કે-પૉપ કલ્ચર આજે વિશ્વપ્રસિદ્ધ છે એ દેશનું અસ્તિત્વ જ ન રહે તો?

રખે આને મજાક સમજતા. જો સમયસર પગલાં લેવામાં નહીં આવે તો આવનારાં થોડાં વર્ષોમાં જ ટેક્નોલૉજીના મામલે અમેરિકાને પણ ટક્કર આપે એવો દક્ષિણ કોરિયા દેશ નામશેષ બની જશે એવા સમાચાર છે.

કોઈ પણ દેશ-પ્રદેશનો વિકાસ અને એની ઓળખ ત્યાં વસતા લોકો પર આધારિત હોય છે, પણ વસવા માટે લોકો જ ન બચે તો એ દેશનું અસ્તિત્વ ટકે ખરું? આ સમસ્યા સામે અત્યારે દક્ષિણ કોરિયા પણ ઝઝૂમી રહ્યો છે. આ દેશના સતત ઘટતા જન્મદરને કારણે હવે એવી નોબત આવી છે કે હવે પછીના સમયમાં આ દેશની વસતિમાં નોંધપાત્ર ઘટાડો જોવા મળશે.

સંસારનો નિયમ છે કે એક વ્યક્તિ જાય અને એની જગ્યા નવા માણસે લેવી પડે છે, પરંતુ દક્ષિણ કોરિયામાં હવે આ કુદરતી ચક્રમાં વિક્ષેપ પડ્યો છે. એક સમયે દક્ષિણ કોરિયા ઝડપી આર્થિક વિકાસ અને આધુનિકીકરણ માટે જાણીતો હતો. આજે એ એની પ્રજાની પ્રજનન ક્ષમતાના ઘટાડાને કારણે ચર્ચામાં છે. અત્યારે પણ આ દેશનો જન્મદર એટલો ઘટી ચૂક્યો છે કે જો હાલત ન સુધરી તો સદીના અંત સુધીમાં દક્ષિણ કોરિયાની વસતિ અત્યારે છે એના કરતાં ત્રીજા ભાગ જેટલી ઘટી જશે.

દક્ષિણ કોરિયામાં આ પરિસ્થિતિ નિર્માણ થવા પાછળ એનો ઈતિહાસ કારણભૂત છે. ૧૯૬૦ના દાયકામાં દક્ષિણ કોરિયાની માથાદીઠ આવક વિશ્વના અન્ય દેશની સરખામણીએ માત્ર ૨૦ ટકા હતી. આની સામે સ્ત્રીઓ સરેરાશ છ બાળક ધરાવતી હતી આથી દક્ષિણ કોરિયાની સરકારે વસતિનિયંત્રણ માટે કડક કાયદા સફળતાપૂર્વક અમલમાં મૂક્યા. સરકારે અર્થવ્યવસ્થા સાથે તાલમેલ સાધવા સ્ત્રીદીઠ સરેરાશ બાળકોની સંખ્યા ૨.૧ કરવાનું લક્ષ્ય નક્કી કર્યું. ૧૯૮૩ સુધીમાં આ લક્ષ્ય પ્રાપ્ત કરવામાં કોરિયા સફળ પણ થયું, પરંતુ ત્યાર પછી જન્મદર સતત ઘટતો રહ્યો અને હાલ તો ૦.૭૨ થઈ ચૂક્યો છે.