ડીપ સ્ટેટની માયાજાળઃ તથ્ય કે તરકટ?

દેશ-વિદેશની સરકારોને અસ્થિર કરતી અજાણી શક્તિઓનો સોનિયા અને રાહુલ ગાંધી હાથો બન્યાં હોવાના આરોપ થઈ રહ્યા છે ત્યારે આ ભેદી જૂથોના કિરદારો ઓળખી લેવા જેવા છે.

- સમીર પાલેજા (મુંબઈ)

સાત અબજ ડૉલરની સંપત્તિના માલિક એવા ૯૪ વર્ષના અમેરિકન યહૂદી બિઝનેસમૅન જ્યોર્જ સોરોસનું નામ ભારતમાં બહુ ગાજ્યું છે. સોરોસે કરોળિયાના જાળાની જેમ ફેલાવેલાં કહેવાતાં સેવાભાવી સંગઠનો (એનજીઓ) કે અન્ય સંસ્થા મોદી સરકારને બદનામ કરવા, સરકાર ઊથલાવી પાડવા જાત-ભાતનાં કાવતરાં કરે છે એવી વાત છેલ્લા કેટલાક સમયથી ઊડે છે.

આ ધનકુબેરે ચાર વર્ષ પહેલાં સ્વિત્ઝરલૅન્ડના દાવોસમાં ભરાયેલી વર્લ્ડ ઈકોનોમિક ફોરમની બેઠકમાં વડા પ્રધાન નરેન્દ્ર મોદી પર ભારતને હિંદુ રાષ્ટ્ર બનાવવાનો ખુલ્લેઆમ આક્ષેપ મૂક્યો હતો. કશ્મીરનો ઉલ્લેખ એણે અર્ધ સ્વાયત્ત મુસ્લિમ રાજ્ય તરીકે કર્યો હતો અને નાગરિકતા સુધારણા ધારા (સીએએ) તથા નૅશનલ રજિસ્ટર ઑફ સિટિઝન્સ (એનઆરસી)ના કાનૂનથી ભારતના મુસ્લિમોની નાગરિકતા છીનવી લેવાશે એવો ભય પણ વ્યક્ત કર્યો હતો. એટલું જ નહીં, ભારત તથા અમેરિકા સહિતના દેશોની રાષ્ટ્રવાદી સરકારોને ઊથલાવી પાડવા બે અબજ ડૉલરનું બજેટ ફાળવવાની જાહેરાત પણ એણે કરી હતી.

હમણાં સંસદમાં ભાજપના નિશિકાંત દુબે તથા ડૉ. સુધાંશુ ત્રિવેદીએ અને પછી પત્રકાર પરિષદમાં ભાજપના રાષ્ટ્રીય પ્રવક્તા સંબિત પાત્રાએ ભારત સરકારને ગબડાવવાના જ્યોર્જ સોરોસ તથા ઓપન સોસાયટી ફાઉન્ડેશન તથા ઑર્ગેનાઈઝ્ડ ક્રાઈમ ઍન્ડ કરપ્શન રિપોર્ટિંગ પ્રોજેક્ટ (ઓસીસીઆરપી) જેવી એની સંસ્થાઓનાં કાવતરાંમાં કોંગ્રેસી નેતા રાહુલ ગાંધી ત્રિકોણનો ત્રીજો ખૂણો હોવાનો આક્ષેપ કરીને સનસનાટી મચાવી. પુરાવા તરીકે એમણે પાછલાં વર્ષોનો ઘટનાક્રમ પણ દર્શાવ્યો, જેમાં સંસદીય સત્ર શરૂ થવાનું હોય એ પહેલાં જ પેગાસસથી લઈને હિન્ડનબર્ગ સુધીના રિપોર્ટ રજૂ કરીને સત્રને ખોરવી નાખવાનું કાવતરું થયું હોય.