મુખ્ય મંત્રીએ કી દબાવી... ને આ રીતે સ્ક્રીન પર ખૂલ્યો ખજાનો!

હવે હાજર છે નવીનક્કોર ડિઝાઈન સાથે ‘ચિત્રલેખા’ ડિજિટલ.

- હેતલ રાવ (ગાંધીનગર)

થ્રી... ટુ... વન...

ગુજરાતના મુખ્ય મંત્રી ભૂપેન્દ્ર પટેલે રિમોટની એક કી દબાવી કે આંખના પલકારામાં સામે ગોઠવાયેલા મોટા સ્ક્રીન પર ખૂલ્યો માહિતી અને મનોરંજનનો ખજાનોઃ ન્યૂઝ, વ્યૂઝ, અવનવી ઈમેજ, વિડિયો અને પોડકાસ્ટ્સ... ગાગરમાં સાગર એ કહેવત જાણે ખરા અર્થમાં સાકાર થતી હોય એમ અહીં ચિત્રલેખા.કૉમની વેબસાઈટમાં રસપ્રદ વાંચન અને દશ્ય-શ્રાવ્ય સામગ્રીનો સમુદ્ર ઘૂઘવતો હતો.

જી, વાત છે લાખ્ખો વાચકોના માનીતા અને વિશ્વભરમાં વસતા ગુજરાતીઓ માટે ગુજરાતી ભાષા, સાહિત્ય અને સંસ્કૃતિની ઓળખ બની રહેલા ચિત્રલેખા સાપ્તાહિકની વેબસાઈટની નવીનક્કોર તૈયાર થયેલી ડિઝાઈનના લૉન્ચ અવસરની.

‘ચિત્રલેખા ગ્રુપ’ના ચૅરમૅન મૌલિક કોટકે પુષ્પશુચ્છથી અભિવાદન કર્યા બાદ મુખ્ય મંત્રી ભૂપેન્દ્રભાઈ પટેલે ‘ટીમ ચિત્રલેખા'ની ઉપસ્થિતિમાં કર્યું નવી વેબસાઈટનું અનાવરણ.

શુક્રવાર, ૬ ડિસેમ્બરની સાંજે ગાંધીનગરમાં મુખ્ય મંત્રી કાર્યાલયમાં મુખ્ય મંત્રીનાં સચિવ અવંતિકા સિંહ, ચિત્રલેખા ગ્રુપના ચૅરમૅન મૌલિક કોટક અને ચિત્રલેખા ટીમના વરિષ્ઠ સભ્યોની ઉપસ્થિતિમાં મુખ્ય મંત્રી ભૂપેન્દ્ર પટેલે આ ડિઝાઈનનું લોકાર્પણ કર્યું. એ પછી આ અવસરે ખાસ તૈયાર કરાયેલો એક ટૂંકો ઓપનિંગ વિડિયો પણ મુખ્ય મંત્રીએ મોબાઈલ ફોનમાં પ્લે કર્યો.