ઢળતી ઉંમરે તૂટતાં લગ્ન...

લગ્નનાં ૨૫-૩૦ ને ક્યારેક ૩૫-૩૭ વર્ષ સુધી એકબીજાને સાથ આપ્યો હોય અને પછી દંપતી છૂટાછેડા લે એ સંબંધવિચ્છેદને ‘ગ્રે ડિવોર્સ’ કહે છે. કોઈ વળી એને ‘સિલ્વર સ્પ્લિટર્સ’ અથવા ‘ડાયમંડ ડિવોર્સ’ પણ કહે છે. વર્ષો અગાઉની એક ફિલ્મનું ગીત હતું, જેમાં હીરો એની પ્રેમિકાને પૂછે છેઃ ‘હમ જબ હોંગે સાઠ સાલ કે ઔર તુમ હોંગી પચપન કી, બોલો પ્રીત નિભાઓગી ના તબ ભી અપને બચપન કી?’ હવે એ જમાનો રહ્યો નથી. સાઠ-પાંસઠ કે પંચોતેરની ઉંમરે સુદ્ધાં પતિ-પત્ની એકમેકથી જુદાં થવાનો નિર્ણય લે છે. કેવાં કેવાં હોય છે કારણ આ પ્રકારના છૂટાછેડાનાં? કેમ વધી રહ્યા છે એવા કિસ્સા?

- હેતલ રાવ (અમદાવાદ)

મહાનગર મુંબઈમાં વસતા અને ઉચ્ચ સરકારી હોદ્દા પર બિરાજતા અનિકેતભાઈ અને એમનાં પત્ની સાધનાબહેને લગ્નનાં ૩૫ વર્ષ બાદ છૂટાં પડવાનું નક્કી કર્યું. છૂટાં પડવાનો નિર્ણય, જો કે સાધનાબહેનનો છે. સ્વ માટે, સમાજ માટે, સંતાનો માટે આ અઘરો નિર્ણય છે, પરંતુ બીજો ઉપાય નહોતો.

સરકારી નોકરી હોવાને કારણે અનિકેતભાઈની વારંવાર બદલી થયા કરે. છેલ્લા સાડા ત્રણેક દાયકાથી વિવિધ શહેરોમાં સાધનાબહેન બે સંતાનો સાથે ઍડ્જસ્ટ કરતાં રહ્યાં. પતિનો જિદ્દી, ગુસ્સાવાળો અને રંગીલો સ્વભાવ પણ સહન કર્યો. વારંવાર થતી બદલીની અકળામણનો ભોગ સાધનાબહેનને જ બનવું પડતું. આમ છતાં બાળકો માટે એ મુશ્કેલી વેઠીને અનિકેતભાઈ સાથે રહ્યાં, પરંતુ એક દિવસ તો અનિકેતભાઈએ બધી જ મર્યાદા વટાવી... અને સાધનાબહેન પાસે ડિવોર્સ સિવાય બીજો કોઈ ઉકેલ ન રહ્યો.

દાંપત્યજીવનમાં ક્યારેક નાની નાની વાતે થતા ઝઘડા મોટી ઉંમરે થયેલાં પતિ-પત્ની એ સમયે છૂટાં થવાનું વિચારે છે. ખરેખર તો

એવું તે શું બન્યું કે સાધનાબહેને ઢળતી ઉંમરે ડિવોર્સ જેવો નિર્ણય લેવો પડ્યો? આ સવાલનો જવાબ મેળવીએ એ પહેલાં થોડાં સપ્તાહ પહેલાં ગાજેલા એક કિસ્સાની વાત. આ કિસ્સો એટલે દિલીપ કુમાર-સાયરા બાનુના છૂટાછેડા. ચોંકવાની જરૂર નથી. વાત ટ્રેજેડી કિંગ અભિનેતા દિલીપ કુમારની નહીં, પણ પ્રખ્યાત સંગીતકાર એ.આર. રેહમાનની છે. વર્ષો અગાઉ ધર્મપરિવર્તન કરનારા અલ્લા રખા (એ.આર.) રેહમાનનું મૂળ નામ દિલીપ હતું. ગયા મહિને રેહમાન–સાયરા બાનુએ પરસ્પર સંમતિથી ૨૯ વર્ષ જૂના સંબંધનો અંત આણ્યો. તે વખતે સમાચાર આવ્યા કે રેહમાન-સાયરા બાનુના ગ્રે ડિવોર્સ.

ઘણાને થાય કે ડિવોર્સ એટલે ડિવોર્સ. એમાં વળી રંગ (ગ્રે) ક્યાંથી ભળી ગયો?

અમેરિકન સંસ્કૃતિમાંથી આવેલા આ શબ્દનો અર્થ છેઃ મોટી ઉંમરે પતિપત્ની છૂટાં પડે એ ગ્રે ડિવોર્સ. મૂળ ગ્રે શબ્દ સફેદ વાળમાંથી આવેલો છે, જે સૂચવે છે કે વાળમાં સફેદી આવી ગયા બાદ, પંચાવન કે એથી મોટી ઉંમરે લીધેલા છૂટાછેડા. ત્યારથી ચોમેર ગ્રે ડિવોર્સ... ગ્રે ડિવોર્સ ગાજવા માંડ્યું.

અનિકેતભાઈ-સાધનાબહેનના પણ ગ્રે ડિવોર્સ છે. થોડા સમય પહેલાં અનિકેતભાઈની બદલી પુણેમાં થઈ. આ દરમિયાન એમણે ઉંમરમાં પોતાનાથી ૨૦ વર્ષ નાની યુવતી સાથે સંબંધ બાંધ્યો. સાધનાબહેન માટે આ આઘાત જીરવવો કપરો હતો. બન્ને સંતાનો લગ્ન કરીને ઠરીઠામ થઈ ગયાં હતાં.