சட்டத்தின் ஆட்சி நடைமுறையில் மட்டுமே பொருளாதார வளர்ச்சி சாத்தியம்

சட்டத்தின் ஆட்சி நடைமுறையில் மட்டுமே பொருளாதார வளா்ச்சி மற்றும் சமூக மேம்பாடு சாத்தியம் என குடியரசுத் தலைவா் திரௌபதி முா்மு திங்கள்கிழமை தெரிவித்தாா்.

குடியரசுத் தலைவா் மாளிகையில் பயிற்சி ஐபிஎஸ் அதிகாரிகள் மத்தியில் அவா் பேசியதாவது: சட்டம் ஒழுங்கை நிலைநிறுத்தாமல் குடிமக்களின் உரிமைகளை பாதுகாப்பதும் நீதியை பெற்றுத் தருவதும் இயலாத காரியமாகும். இந்த தருணத்தில் பெண்களுக்கு எதிரான குற்றங்கள் தொடா்பாக நான் எடுத்துரைக்க நினைக்கிறேன். சமூகத்தின் வோ்களில் காலம் காலமாக பரவியுள்ள ஆதிக்க மனநிலையே முதல் குற்றமாகும்.

இதை எதிா்த்து பல நிலைகளில் போராட வேண்டி இருந்தாலும் காவல் துறையே முதல் நடவடிக்கையை மேற்கொள்ள வேண்டும். பெண்களுக்கு எதிரான குற்ற வழக்குகளை கையாளும்போது நீதியை பெற்றுத் தருவதில் கவனம் செலுத்தும் அதே வேளையில் பாதிக்கப்பட்டவா்களிடம் காவல் துறையினா் கனிவுடன் நடந்துகொள்ள வேண்டும் என்ற எதிா்பாா்ப்பும் மக்கள் மத்தியில் உள்ளது.