అడవి నుంచి...అమ్మా..నన్ను మన్నించు..!

చివరిచూపునకు రాలేకపోయి నందుకు.. జనం మధ్య, జనం కోసం, జనంతో ఉండి నీ అంత్య క్రియలను చూడలేకపోయి నందుకు.. అంటూ ఇటీవలే మరణించిన పెద్దపల్లి పెద్దమ్మ మధురమ్మ చిన్నకొడుకు, సీపీఐ(మావోయిస్టు) పొలిట్ బ్యూరో సభ్యులు మల్లోజుల వేణుగోపాల్ రాసిన లేఖ..

చివరిచూపునకు రాలేకపోయి నందుకు.. జనం మధ్య, జనం కోసం, జనంతో ఉండి నీ అంత్య క్రియలను చూడలేకపోయి నందుకు.. అంటూ ఇటీవలే మరణించిన పెద్దపల్లి పెద్దమ్మ మధురమ్మ చిన్నకొడుకు, సీపీఐ(మావోయిస్టు) పొలిట్ బ్యూరో సభ్యులు

మల్లోజుల వేణుగోపాల్ రాసిన లేఖ..

కట్టా నరేంద్రచారి గారికి నమస్తే

అన్నా, నువు ఎవరో నాకు తెలియదు. అమ్మ గురించి నువు రాసిన మాటలు నన్ను కన్నీళ్ల పర్యంతం చేశాయి. నీకు చేతులెత్తి దండం పెడుతున్నానన్నా. అమ్మతో నాకున్న ఆత్మీయానుబంధాన్ని నీ అక్షరాలు శక్తిమంతంగా నా ముందు నిలిపి నన్ను ఏడిపించాయి. మీ ఆశీస్సులు, సహకారం వుంటే విప్లవకారుల కుటుంబాలు గుండె ధైర్యంతో వుండడమే కాదు, నాలాంటి వాళ్లు మరింత పట్టుదల, ఉత్సాహంతో నమ్మిన ప్రజల కోసం బొందిలో ప్రాణం వున్నంత వరకు పని చేస్తామన్నా. నేనింత కన్నా మరేం రాయాలన్నా. మూడు కుర్చీలలో వున్న నావారి పక్కన నాల్గవ కుర్చీలో నాకు స్థానం ఇవ్వండని మిగిలిన నా కుటుంబ సభ్యులను కోరుకోవడం తప్ప నాకు మరేం అవసరం లేదన్నా. సంపదలు, ఆస్తులు మాకెందుకన్నా. నా భుజాల మీద కూచోని నాతో ఆటలాడుకున్న నా తల్లి దీప, దాని సోదరులు మా ఇంటి ముఖం చూడని బాబాయ్ మాకొకడు వున్నాడని గుర్తు పెట్టుకుంటే చాలన్నా. కోట్లాది జనం గుండెల్లో మా స్థానం పదిలంగా భద్రపరచబడిందని తెలుసు కదా.నాకు అడవిలో ఎందరో పేరీలు (పెద్దమ్మలు), కూచిలు (చిన్నమ్మలు) వున్నారు. నేను కొద్ది మాసాలు అగుపడకుంటే తల్లడి ల్లిపోతారు. వాకబు చేస్తుంటారు, 'బిడ్డకు ఏం కాలేదు కదా?' అని. ఆ ప్రేమ చాలు. అమరుడైన నా సోదరుడి సహచరి నా వదిన ఈ వార్తను ఎలా తట్టుకుంటుందోనన్నదే ఇప్పుడు నా చింత. ఈ మధ్యనే నన్ను కలసి వెళ్లింది. క్షేమంగానే వుంది. ఉంటానన్నా. అన్నా. నీ అనుమతి లేకుండా నీ ఫోన్ నంబరు ఈనా స్పందనను పంపుతున్నందుకు మన్నించన్నా.

-సోదరుడు

(‘అమ్మా మళ్లీ పుడతావా?' అంటూ 'దిశ'లో ప్రచురితమైన కథనానికి స్పందనగా)