જે આરામ ગામડાની હવા આપે એ એ.સી.વાળી રૂમ પણ નથી આપતી

ગામડું એટલે શાંતિની જિંદગી; જ્યાં નથી કોઈ ખોટો દંભ કે ઝાકઝમાળ, નથી દેખાદેખી કે હુંસાતુંસી.

ગામડું એટલે શાંતિની જિંદગી; જ્યાં નથી કોઈ ખોટો દંભ કે ઝાકઝમાળ, નથી દેખાદેખી કે હુંસાતુંસી. ત્યાં છે બસ પરસ્પર પ્રેમ અને લાગણી. મોટાં શહેરોમાં દોડતી ભાગતી જિંદગી, ટેન્શન જીવનનો એક ભાગ બની ગયો છે. જો તેમાંથી તેઓ પસાર ના થાય; તો તેમને જીવનનિર્વાહ કરવો મુશ્કેલ થઈ પડે, પરંતુ જ્યારે શહેરી માણસ આ બધાથી થાકી જાય, ત્યારે તે ગામડાં તરફ વળે છે, કારણ કે જેટલો આરામ ગામડાની ઠંડી હવા આપે, તેટલો આરામ એ.સી.વાળી રૂમ પણ નથી આપી શકતી! ટેન્શન, થાક વગેરેને કારણે ક્યારેક એ.સી.વાળી રૂમમાં આરામ કરવા માટે ઊંઘની દવા લેવી પડે, જ્યારે ગામડાની ઠંડી હવામાં તો વગર કોઈ દવાએ ઘસઘસાટ ઊંઘ આવી જાય. એટલે જ શહેરી લોકો ગામડામાં ફાર્મહાઉસ બનાવે છે, જેથી વીક એન્ડમાં કે વર્ષમાં ઓછામાં ઓછું એક વાર પરિવાર સાથે, મિત્રો સાથે ત્યાં જઈ આરામ કરી શકે, દોડતી ભાગતી જિંદગીને થોડીવાર માટે થોભી જા!’ કહી શકે.