വിപ്ലവ നക്ഷത്രം 100ലേക്ക്

വി എസിന് ഇന്ന് പിറന്നാൾ

തിരുവനന്തപുരം : രാഷ്ട്രീയ കേരളത്തിന്റെ ജനപ്രീയ നേതാവ് വി എസ് അച്യുതാനന്ദൻ ഇന്ന് നൂറു വയസ്ലേയ്ക്ക് കടക്കുന്നു.എല്ലാക്കാലവും നിലപാടുകൾ തുറന്നു പറയാൻ കാണിച്ച ധൈര്യവും ആർജ്ജവവും കാരണം ആരാധകരേയും വിമർശകരേയും ഒരുപോലെ സൃഷ്ടിച്ച ഈ നേതാവിന്റെ പിറന്നാൾ ആഘോഷങ്ങൾ ഇത്തവണ വീട്ടിലൊതുങ്ങും. പ്രായത്തിന്റെ അവശതകൾ കാരണം സജീവ രാഷ്ട്രീയത്തിൽ നിന്ന് വിട്ടു നിൽക്കുമ്പോഴും ഇന്നും ഓരോ വിഷയങ്ങളിലും വി എസിന്റെ വാക്കുകൾക്കായി കേരളം കാതോർക്കുന്നു എന്നത് വലിയ പ്രത്യേകത.ഈ ഒരു പ്രായത്തിലും തനിക്ക് പറയാനുള്ള കാര്യങ്ങളിൽ വ്യക്തതക്കുറവും കാണിക്കുന്നില്ല .1923 ഒക്ടോബർ 20 -നാണ് ആലപ്പുഴ ജില്ലയിലെ പുന്നപ്രയിൽ വേലിക്കകത്ത് വീട്ടിൽ ശങ്കരന്റെയും അക്കമ്മയുടെയും മകനായി വേലിക്കകത്ത് ശങ്കരൻ അച്യുതാനന്ദൻ എന്ന വി എസ് അച്യുതാനന്ദൻ ജനിച്ചത്. പതിനൊന്നാമത്തെ വയസ്സാകുമ്പോഴേക്കും അമ്മയേയും അച്ഛനേയും അദ്ദേഹത്തിന് നഷ്ടപ്പെട്ടിരുന്നു. പിന്നെ വളർത്തുന്നത് സഹോദരിയാണ്. അച്ഛനെ നഷ്ടമായതോടെ പഠനം നിർത്തേണ്ടിവന്നു വി എസിന്. പിന്നെ, ജ്യേഷ്ഠന്റെ സഹായിയായി ജൗളിക്കടയിൽ ജോലി നോക്കി കുറേനാൾ. അതിനുശേഷം കയർ ഫാക്ടറി തൊഴിലാളിയായി.