અમદાવાદ સોનામાં રૂ.66,500નો રેકોર્ડ : ચાંદી રૂ.2000 ઉછળીને રૂ.73,000

વિશ્વ બજાર ઉછળતાં ઘરઆંગણે ઈમ્પોર્ટ કોસ્ટ રાતોરાત વધી ગઈ વૈશ્વિક સોનું ઉછળી ૨૧૦૦ ડોલર પાર કરી નવી ટોચે

અમદાવાદ સોના-ચાંદી બજારમાં આજે સોનામાં રેકોર્ડ તેજી આગળ વધી હતી. અમદાવાદ સોના-ચાંદી બજારમાં આજે સોનાના ભાવ ૧૦ ગ્રામના વધુ રૂ.૯૦૦ ઉછળી રૂ.૬૬ હજા૨ની સપાટી કુદાવી ૯૯.૫૦ના ભાવ રૂ.૬૬૩૦૦ તથા ૯૯.૯૦ના ભાવ રૂ.૬૬૫૦૦ના નવા ઉંચા મથાળાને આંબી ગયા હતા. અમદાવાદ ચાંદીના ભાવ આજે કિલોદીઠ ઝડપી રૂ.૨૦૦૦ વધી રૂ.૭૩,૦૦૦ બોલાતા થયા હતા.

દેશના ઝવેરી બજારોમાં આજે તેજીનું તોફાન જોવા મળ્યું હતું. વિશ્વ બજારમાં સોનાના ભાવ ઉછળી ઔંશના ૨૧૦૦ ડોલરની સપાટી કુદાવી ગયાના સમાચાર હતા. વિશ્વ બજાર ઉછળતાં ઘરઆંગણે ઈમ્પોર્ટ કોસ્ટ ઝડપી વધી જતાં ઝવેરી બજારોમાં તોફાની તેજી આજે જોવા મળી હતી. સોનાના ભાવ ઉછળતાં તેની પાછળ ચાંદીના ભાવ પણ ઉછળતા જોવા મળ્યા હતા.