அரசு பள்ளியில் சத்துணவை சாப்பிட்டு ஆய்வு செய்த ஆட்சியர்

திருவண்ணாமலை மாவட்டம், துரிஞ்சாபுரம் ஊராட்சி ஒன்றியம் சாணானந்தல் ஊராட்சியில் ஊரக வளர்ச்சி மற்றும் ஊராட்சித் துறையின் மூலம் மகாத்மா காந்தி தேசிய ஊரக வேலை வாய்ப்பு உறுதி திட்டத்தின் கீழ் பணிகள் நடைபெற்று வருவதை மாவட்ட ஆட்சியர் முருகேஷ் நேரில் சென்று பார்வையிட்டு ஆய்வு செய்தார்.

ஊரக வளர்ச்சித்துறையின் மூலம் மகாத்மா காந்தி தேசிய ஊரக வேலை வாய்ப்பு உறுதி திட்டத்தின் கீழ் ரூ.16.65 இலட்சம் மதிப்பீட்டில் வட்டார நாற்றாங்கால் அமைக்கும் பணியினை ஆய்வு செய்தார்.

இதனைத் தொடர்ந்து ஊரக வளர்ச்சித் துறையின் மூலம் செயல்படுத்தப்பட்டு வரும் நாற்றாங்கால் பண்ணையில் பழச்செடிகள் நடவு செய்யும் முறை, மாட்டுத் தீவனங்களுக்கான விதையினை தூவி நடவு பணியினை பார்வையிட்டார். மேலும் முருங்கை, பலா, கொய்யா, நெல்லி, சீத்தா போன்ற பழ வகை கன்றுகள் நடும் பணியினை கேட்டறிந்தார்.

இது போன்ற மரக்கன்றுகளை அதிகளவில் நட வேண்டும் என்றும் வலியுறுத்தினார். மேலும் மண்புழு உரங்கள் தயாரிக்கும் பணியினையையும் நேரில் பார்வையிட்டு தயாரிக்கும் முறையினையையும் கேட்டறிந்தார். 10 நாட்களுக்குள் வளர்ந்து பலன் தரக்கூடிய அசோலா ஆடு, மாடு, மீன்களுக்கு உணவாக வழங்கப்படும் அசோலா வளர்ப்பு முறையை பற்றியும் கேட்டறிந்தார்.