காரைக்காலுக்கு ஆரஞ்சு அலர்ட் : முன்னெச்சரிக்கை நடவடிக்கை குறித்து கலெக்டர் அலுவலகத்தில் ஆலோசனை

காரைக்காலுக்கு இன்று முதல் கனமழை தொடர்பாக ஆரஞ்சு அலர்ட் விடுக்கப் பட்டுள்ளதால், முன்னெச் சரிக்கை நடவடிக்கை குறித்து கலெக்டர் அலுவலகத்தில் ஆலோசனை கூட்டம் நேற்று இரவு மாவட்ட கலெக்டர் அலுவலகத்தில் நடைபெற்றது.

வங்கக்கடலில் உருவாகி உள்ள காற்றழுத்தம் காரைக்கால் மாவட்டத்தை மையமாகக் கொண்டு காற்றழுத்த தாழ்வு மண்டலமானது நகரும் என்பதால், மாவட்டத்திற்கு அடுத்த 4 நாட்களுக்கு ஆரஞ்சு அலர்ட் விடுக்கப்பட்டுள்ளது. இதனை அடுத்து கனமழைக்கு முன்னெச்சரிக்கை நடவடிக்கைகள் மேற்கொள்வது குறித்த அவசர ஆலோசனைக் கூட்டம் மாவட்ட கலெக்டர் அலுவலகத்தில் நேற்று இரவு நடைபெற்றது.

கூட்டத்திற்கு மாவட்ட கலெக்டர் மணிகண்டன் தலைமை தாங்கினார். புதுச்சேரி குடிமை பொருள் வழங்கல் மற்றும் நுகர்வோர் விவகாரங்கள் துறை அமைச்சர் பிஆர்என் திருமுருகன் முன்னிலை வகித்தார். கூட்டத்தில் காரைக்கால் தெற்கு தொகுதி சட்டமன்ற உறுப்பினர் நாஜிம், நிரவி திருப்பட்டினம் தொகுதி சட்டமன்ற உறுப்பினர் நாக தியாகராஜன், மாவட்ட சீனியர் போலீஸ் சூப்பிரண்டு லட்சுமி சவுஜன்யா, துணை கலெக்டர்கள் அர்ஜுன் ராமகிருஷ்ணன் (வருவாய்), வெங்கடகிருஷ்ணன் (பேரிடர் மேலாண்மை), போலீஸ் சூப்பிரண்டு சுப்பிரமணியன் (தெற்கு), இந்திய கடலோர காவல் படை அதிகாரிகள், மாவட்ட பேரிடர் மீட்பு படை மற்றும் அனைத்து துறை அதிகாரிகள் கலந்துகொண்டனர்.