லஞ்ச வழக்கில் தலைமைப் பொறியாளர் கைது அமைச்சர் பதவி விலகக் கோரி பேரவையில் தர்ணா

திமுக., காங்கிரஸ் உறுப்பினர்களை வெளியேற்ற சபாநாயகர் அதிரடி உத்தரவு

புதுச்சேரி சட்டப்பேரவை இன்று காலை 9.30 மணிக்கு கூடியது. சபாநாயகர் செல்வம், கேள்வி நேரத்தை தொடங்கினார்.

அப்போது குறுக்கிட்ட எதிர்க்கட்சித் தலைவர் சிவா, லஞ்ச வழக்கில் புதுச்சேரி தலைமைச் செயலாளருக்கு இணையாக பணியாற்றிய பொதுப்பணித் துறை தலைமைப் பொறியாளர் தீனதயாளன் உள்ளிட்ட அதிகாரிகளை CBI அதிகாரிகள் கைது செய்துள்ளனர். இது புதுச்சேரி அரசுக்கு அவப்பெயரை ஏற்படுத்தும். இதற்கு தார்மீக பொறுப்பேற்று பொதுப்பணித் துறை பொறுப்பு வகிக்கும் அமைச்சர் லட்சுமிநாராயணன் பதவி விலக வேண்டும். இதுகுறித்து பேரவையில் விவாதிக்க வேண்டும் என்ற கோரிக்கையை முன்வைத்தார்.

அதற்கு சபாநாயகர் செல்வம் அனுமதி அளிக்க மறுத்தார்.

இதனையடுத்து, இதை கண்டித்து எதிர்க்கட்சித் தலைவர் சிவா, துணைத்தலைவர் A.M.H. நாஜிம், சட்டமன்ற உறுப்பினர்கள் அனிபால் கென்னடி, சம்பத், செந்தில்குமார், நாக. தியாகராஜன், சட்டமன்ற காங்கிரஸ் கட்சித் தலைவர் வைத்தியநாதன் மற்றும் ரமேஷ் பரம்பத் ஆகியோர் பேரவையின் மைய மண்டபத்தின் நடுவில் அமர்ந்து தர்ணாவில் ஈடுபட்டனர்.