રખડતાં ઢોરો સહિતની સમસ્યા અંગેની ગાઈડલાઈનનો હવે કડકાઈથી અમલ

તાકીદ: શહેરી વિકાસ વિભાગના અગ્ર સચિવ અશ્વિનીકુમારે ઉચ્ચાધિકારીઓ સાથે વીડિયો કોન્ફરન્સથી સમીક્ષા કરી હવેથી સમસ્યાઓના નિરાકરણ માટેની કામગીરી અંગેના ફોટોગ્રાફસ સાથે આંકડાકીય માહિતી દૈનિક ધોરણે શહેરી વિકાસ વિભાગને ગૂગલ શીટમાં અપલોડ કરવી પડશે

ગુજરાત હાઇકોર્ટની ફટકાર બાદ શહેરી વિકાસ અને શહેરી ગૃહનિર્માણ વિભાગના અગ્ર સચિવ અશ્વિનીકુમારે રખડતા ઢોરોની સમસ્યાના નિવારણ માટે ગાંધીનગર ખાતેથી ઉચ્ચ અધિકારીઓની તાકીદની બેઠક યોજી હતી. રખડતા ઢોરોના નિયંત્રણ માટે રાજ્ય સરકારે જે ખાસ ગાઇડલાઇન તૈયાર કરી છે તેનો ચુસ્તપણે અમલ કરીને નાગરિકોને સુરક્ષિત કરવા સૂચનાઓ આપી હતી. આ બેઠક બાદ મ્યુનિ. એડમિનિસ્ટ્રેશન કમિશનર રાજકુમાર બેનીવાલે, મહાનગર પાલિકાઓ, નગર પાલિકાઓ તથા જિલ્લાના અધિકારીઓ સાથે વીડિયો કોન્ફરન્સના માધ્યમથી સમીક્ષા કરી હતી. એમાં પણ તેમણે રખડતા ઢોરોના ત્રાસથી નાગરિકોને બચાવવા માટે સધન આયોજન કરી સંનિષ્ઠ પ્રયાસો કરવા સૂચના આપી હતી.