ચીનમાં ભેદી બીમારી અંગે સરકાર એલર્ટ તૈયારીઓની સમીક્ષાની સુચના અપાઈ

આ રોગચાળો જાણીતા પેથોજેન્સને કારણે થાય છેઃ ચીની નેશનલ હેલ્થ કમિશન

ચીનમાં બાળકોમાં શ્વસન સંબંધી રોગોમાં થયેલા આકસ્મિક વધારા વચ્ચે કેન્દ્ર સરકારે આવા રોગોનો સામનો કરવા માટેની તૈયારીઓની સમીક્ષા શરૂ કરી દીધી છે. આ અંગે કેન્દ્રએ કહ્યું છે કે તે સ્થિતિ પર ચાંપતી નજર રાખી રહ્યું છે. તેણે સ્પષ્ટતા કરી છે કે ગભરાવાની કોઈ જરૂર નથી. આરોગ્ય મંત્રાલયે રાજ્યો અને કેન્દ્રશાસિત પ્રદેશોને જાહેર આરોગ્ય અને હોસ્પિટલ સજ્જતાના પગલાંનું તાત્કાલિક મૂલ્યાંકન કરવા જણાવ્યું છે. તેને લગતા નિર્દેશોમાં આરોગ્ય મંત્રાલયે હોસ્પિટલોમાં માનવ સંસાધન, હોસ્પિટલના પલંગ, આવશ્યક દવાઓ, તબીબી ઓક્સિજન, એન્ટિબાયોટિક્સ, વ્યક્તિગત રક્ષણાત્મક ઉપકરણો અને પરીક્ષણ કીટ  ની પૂરતી ઉપલબ્ધતા સુનિશ્ચિત કરવા પર ભાર મૂક્યો છે.