રાજ્યપાલો રાષ્ટ્રપતિને બિલો ક્યારે મોકલી શકે તેની ગાઇડલાઇન ઘડવા SCની વિચારણા

વિવાદ: કેરળના રાજ્યપાલ અને મુખ્યમંત્રી સાથે મળીને બિલોનો ઉકેલ લાવેઃસુપ્રીમ કોર્ટ

 કેરળ વિધાનસભામાં પસાર કરાયેલા બિલોને બે વર્ષ સુધી પેન્ડિંગ રાખવા બદલ રાજ્યના રાજ્યપાલ આરિફ મોહમ્મદ ખાન પર નારાજગી વ્યક્ત કરતા સુપ્રીમ કોર્ટે બુધવારે જણાવ્યું હતું કે રાજ્યપાલો સંમતિ માટે ભારતના રાષ્ટ્રપતિને બિલ ક્યારે મોકલી શકે તે અંગેની માર્ગદર્શિકા ઘડવા અંગે કોર્ટ વિચારણા કરશે.

સુપ્રીમ કોર્ટ કેરળ સરકારની એ અરજી પર વિચારણા કરી રહી છે, જેમાં રાજભવન પર બિલોને મંજૂરી આપવામાં વધુ વિલંબ કરવાનો આરોપ લગાવવામાં આવ્યો છે. સુપ્રીમ કોર્ટે બુધવારે કેરળના રાજ્યપાલ આરિફ મોહમ્મદ ખાનને ફટકાર લગાવી છે અને કહ્યું કે પંજાબના મામલામાં પહેલાં જ જણાવી દેવામાં આવ્યું છે કે રાજ્યપાલની શક્તિનો ઉપયોગ વિધાનસભાને કાયદો બનાવવાની પ્રક્રિયાથી રોકવા માટે કરી શકાય નહીં.