പറമ്പിക്കുളം ഡാമിന്റെ ഷട്ടർ തകർന്നു

ചാലക്കുടി പുഴയിലേക്ക് വെള്ളപ്പാച്ചിൽ

പറമ്പിക്കുളം: തമിഴ്നാടിന്റെ നിയന്ത്രണത്തിലുള്ള പറമ്പിക്കുളം ഡാമിന്റെ മധ്യഭാഗത്തെ ഷട്ടർ ബുധനാഴ്ച പുലർച്ചെ തകർന്നു. തുടർന്ന് ലക്ഷക്കണക്കിന് ലിറ്റർ വെള്ളം ചാലക്കുടി പുഴയിലേക്ക് ഇരച്ചൊഴുകി. സ്ഥിതി നിയന്ത്രണ വിധേയമെന്നും ആശങ്കപ്പെടാനില്ലെന്നും തമിഴ്നാട് ജലവിഭവ വകുപ്പ് അറിയിച്ചിട്ടുണ്ടെങ്കിലും ചാലക്കുടി പുഴയോരത്തെ ജനങ്ങൾ വെള്ളപ്പൊക്ക ഭീതിയിലാണ്. സെക്കൻഡിൽ 20,000 ഘനയടി വെള്ളമാണ് ഒഴുകുന്നത്. ഇത്രയും വെള്ളം കുതിച്ചെത്തുന്നത് പെരിങ്ങൽകുത്ത് ഡാമിനും ഭീഷണിയാണ്. പെരിങ്ങൽ കുത്ത് ഡാമിലേക്കും തുടർന്ന് ചാലക്കുടി പുഴയിലേക്കുമാണ് ഈ വെള്ളമെത്തുക.