നവ വിജയം

ഒമ്പത് പേരുമായി കളിച്ച് പഞ്ചാബിനെ ഏക ഗോളിന് വീഴ്ത്തി കേരള ബ്ലാസ്റ്റേഴ്സ്

ന്യൂഡൽഹി: തോൽവിത്തുടർച്ചകളുടെ ആധി തീർത്ത് പഞ്ചാബിനെതിരെ അവരുടെ തട്ടകത്തിൽ ആധികാരിക ജയവുമായി കേരള ബ്ലാസ്റ്റേഴ്സ്. ഒമ്പതുപേരുമായി ചുരുങ്ങിയിട്ടും തളരാത്ത പോരാട്ട വീര്യം നിലനിർത്തിയ ടീം നോഹ സദൂയി നേടിയ ഏക ഗോളിനാണ് ജയം പിടിച്ചെടുത്തത്.

ഇനിയൊരു തോൽവി താങ്ങാനാകാത്തതിനാൽ ലക്ഷണമൊത്ത ലൈനപ്പുമായാണ് ഡൽഹി ജവഹർലാൽ നെഹ്റു മൈതാനത്ത് പഞ്ചാബിനെതിരെ ബ്ലാസ്റ്റേഴ്സ് ബൂട്ടുകെട്ടിയത് ഗോൾ വല കാത്ത് സച്ചിൻ ഇറങ്ങിയപ്പോൾ പ്രതിരോധത്തിൽ അൽബാൻ, ഹോർമിപാം, മിലോസ്, നവോച്ച എന്നിവരും മധ്യനിരയിൽ ഫ്രെഡ്ഡിയും ഡാനിഷും മുന്നേറ്റത്തിൽ കോറു, ലൂന, പെർ, നോഹ സായി എന്നിവരുമായിരുന്നു ആദ്യ ഇലവൻ. സ്വന്തം അക്കാദമിയിൽ നിന്നിറങ്ങിയ മുഹമ്മദ് സുഹൈലിനെ ആദ്യ ഇലവനിൽ പരീക്ഷിച്ചതായിരുന്നു പഞ്ചാബ് നിരയിലെ പ്രധാന വിശേഷം.