മാനം കറുത്തു കാത്തു

ബംഗ്ലാദേശിനെതിരേ ഇന്ത്യക്ക് അഞ്ച് റണ്ണിന്റെ ആവേശജയം ട്വന്റി-20 ക്രിക്കറ്റ് ലോകകപ്പിൽ ഇന്ത്യയുടെ മൂന്നാം ജയം ഗ്രൂപ്പ് 2 പോയിന്റ് പട്ടികയിൽ ഒന്നാമത്, സെമിക്കരികെ

അഡലെയ്ഡ്: ഇരുണ്ട മാനത്തിനു കീഴിൽ ജയപരാജയങ്ങൾ  മാറിമറിഞ്ഞ ആവേശപ്പോരാട്ടത്തിൽ ബംഗ്ലാദേശിന്റെ പോരാട്ടവീര്യം മറികടന്ന ഇന്ത്യ ട്വന്റി-20 ക്രിക്കറ്റ് സെമി ഫൈനലിനരികെ. മഴ ഇടക്ക്അലങ്കോലമാക്കിയ ഗ്രൂപ്പ് രണ്ടിലെ മത്സരത്തിൽ ഡ്വർത്ത് ലൂയിസ് നിയമപ്രകാരം പുനർ നിശ്ചയിച്ച വിജയലക്ഷ്യത്തിന് അഞ്ചു റണ്ണകലെ ബംഗ്ലാ കടുവകളെ ഇന്ത്യൻ ബൗളർമാർ പിടിച്ചുകെട്ടി.

ആദ്യം ബാറ്റ് ചെയ്ത ഇന്ത്യ നേടിയത് ആറു വിക്കറ്റിന് 184 റൺ. മഴയുടെ പശ്ചാത്തലത്തിൽ ബംഗ്ലാദേശിന്റെ വിജയലക്ഷ്യം 16 ഓവറിൽ 151 റണ്ണായി. നാലു വിക്കറ്റ് ശേഷിക്കെ അവസാന ഓവറിൽ ജയിക്കൻ ബംഗ്ലാദേശിന വേണ്ടിയിരുന്നത് 20 റൺ. അവസാന ഓവർ എറിയാൻ നിയോഗിക്കപ്പെട്ടത് താരതമ്യേനെ പുതുമുഖമായ അർഷ്ദീപ് സിങ്. ഒന്നു വീതം ഫോറും സിക്സും പറത്തി നൂറുൾ ഹസനും ടസ്കിൻ അഹമ്മദും ചേർന്ന് അടിച്ചെടുത്തത് 14 റൺ മാത്രം.