എറിഞ്ഞിട്ടു

രണ്ടാം ടെസ്റ്റ് രാവിലെ ഒൻപത് മുതൽ സോണി സിക്സിൽ

മിർപുർ: ബംഗ്ലാദേശിനെതിരായ രണ്ടാം ക്രിക്കറ്റ് ടെസ്റ്റിൽ ഇന്ത്യക്കു മുൻതൂക്കം. ബംഗ്ലാദേശിനെ ഒന്നാം ദിവസം തന്നെ 227 റണ്ണിന് ഓൾ ഔട്ടാക്കാൻ ഇന്ത്യക്കായി.

കളി നിർത്തുമ്പോൾ ഇന്ത്യ വിക്കറ്റ് പോകാതെ 19 റണ്ണെന്ന നിലയിലാണ്. വെളിച്ചക്കുറവു മൂലം മത്സരം നേരത്തേ നിർത്തി. ഒന്നാം ദിവസത്തെ കളി തീരാൻ 14 ഓവർ ശേഷിക്കേയാണു ബംഗ്ലാ ബാറ്റർമാർ ഓൾഔട്ടായത്. ശുഭൻ ഗിൽ (20 പന്തിൽ ഒരു സിക്സറും ഫോറുമടക്കം 14), നായകൻ ലോകേഷ് രാഹുൽ (മൂന്ന്) എന്നിവരാണു ക്രീസിൽ. രണ്ടാം ദിവസം രാവിലെ തന്നെ ബംഗ്ലാദേശിനു മുന്നിലെത്താനാകും ഇന്ത്യൻ ബാറ്റർമാരുടെ ശ്രമം. ഷേരെ ബംഗ്ലാ സ്റ്റേഡിയത്തിൽ ടോസ് നേടിയ നായകൻ ഷാക്കിബ് അൽ ഹസൻ ആദ്യം ബാറ്റ് ചെയ്യാൻ തീരുമാനിച്ചു.