ജോഡോ യാത്രയ്ക്ക് പരിസമാപ്തി

ഇന്ന് പൊതുസമ്മേളനം തൃണമൂൽ, സമാജ് വാദി, ടി.ഡി.പി, ബി.എസ്.പി, എസ്.പി വിട്ടുനിന്നേക്കും കേരളഘടകം വിയോജിപ്പിൽ; സി.പി.എമ്മും മാറിനിൽക്കും

ശ്രീനഗർ: സ്നേഹത്തിന്റെയും സൗഹാർദത്തിന്റെയും കാഹളമുയർത്തി കോൺഗ്രസ് നേതാവ് രാഹുൽ ഗാന്ധി നേതൃത്വം നൽകിയ ഭാരത് ജോഡോ യാത്രയ്ക്കു വിജയകരമായ പരിസമാപ്തി. ചരിത്രപ്രസിദ്ധമായ ശ്രീനഗറിലെ ലാൽ ചൗക്കിൽ ദേശീയപതാക ഉയർത്തി അഭിവാദ്യം അർപ്പിച്ചതോടെയാണ് 145 ദിവസത്തെ പദയാത്ര അവസാനിച്ചത്. യാത്രയുടെ ഔദ്യോഗിക സമാപന സമ്മേളനം ഇന്നു ശ്രീനഗറിൽ നടക്കും.

 സമാപന സമ്മേളനത്തിൽ 12 രാഷ്ട്രീയപ്പാർട്ടി നേതാക്കൾ സംബന്ധിക്കും. 21 പ്രതിപക്ഷകക്ഷികളെ ക്ഷണിച്ചിരുന്നതാണ്. തൃണമൂൽ കോൺഗ്രസ്, സമാജ് വാദി പാർട്ടി, ടി.ഡി.പി, ബി.എസ്.പി, എസ്.പി തുടങ്ങി പ്രതിപക്ഷത്തെ പ്രമുഖകക്ഷികൾ പങ്കെടുക്കില്ലെന്നാണു വിവരം. ഡി.എം.കെ, എൻ.സി.പി, ആർ.ജെ.ഡി, ശിവ സേന (ഉദ്ധവ് വിഭാഗം), സി.പി.ഐ. വി.സി.കെ, കേരളാ കോൺഗ്രസ്, നാഷ ണൽ കോൺഫറൻസ്, പി.ഡി.പി, ജെ. എം.എം, ജെ.ഡിയു തുടങ്ങിയവയുടെ പ്രതിനിധികളുടെ സാന്നിധ്യം സമാപന സമ്മേളനത്തിലുണ്ടാകും.