ജയിച്ചു തുടങ്ങി

ഒന്നാം ഏകദിനത്തിൽ ഇന്ത്യക്ക് അഞ്ച് വിക്കറ്റ് ജയം ജഡേജ മാൻ ഓഫ് ദ് മാച്ച്

 ബാറ്റിങ്ങിലും കീപ്പിങ്ങിലും തിളങ്ങി ലോകേഷ് രാഹുൽ

മുംബൈ: ഓസ്ട്രേലിയയ്ക്കെതിരായ ഏകദിന ക്രിക്കറ്റ് പരമ്പരയിലെ ആദ്യ മത്സരത്തിൽ ഇന്ത്യക്ക് അഞ്ച് വിക്കറ്റ് ജയം. വാങ്കഡെ സ്റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് ചെയ്ത ഓസ്ട്രേലിയ 188 റണ്ണിന് ഓൾ ഔട്ടായി. മറുപടി ബാറ്റ് ചെയ്ത ഇന്ത്യ കളി തീരാൻ 61 പന്തുകൾ ശേഷിക്കേ വിജയ റണ്ണെടുത്തു.

രവീന്ദ്ര ജഡേജയുടെ ഓൾറൗണ്ട് മികവും (69 പന്തിൽ പുറത്താകാതെ 45 റണ്ണും രണ്ട് വിക്കറ്റും) ലോകേഷ് രാഹുലിന്റെ അർധ സെഞ്ചുറിയുമാണ് (91 പതിൽ ഒരു സിക്സറും ഏഴ് ഫോറുമടക്കം പുറത്താകാതെ 75) ഇന്ത്യയെ ജയത്തിലെത്തിച്ചത്. മൂന്ന് ഏകദിനങ്ങളുടെ പരമ്പരയിൽ ഇന്ത്യ 1-0 ത്തിനു മുന്നിലാണ്. രണ്ടാം ഏകദിനം ഞായറാഴ്ച വിശാഖപട്ടണത്ത് നടക്കും. 189 റണ്ണിന്റെ വിജയ ലക്ഷ്യം നേടാനിറങ്ങിയത് ഇന്ത്യക്ക് ഓസീസ് ബൗളർമാർ കടുത്ത വെല്ലുവിളി നൽകി. രണ്ടാം ഓവറിൽ തന്നെ ഇഷാൻ കിഷൻ (മൂന്ന്) മടങ്ങി.