પૂર્વ ઝોન મચ્છરજન્ય રોગચાળાનું હબઃ મેલેરિયા અને ડેન્ગ્યુના સૌથી વધુ કેસ

રામોલ-હાથીજણમાં ડેન્ગ્યુના ૧૩ કેસ નોંધાતાં લોકોમાં ગભરાટ: નરોડા અને કુબેરનગર વોર્ડમાં ચિકનગુનિયાએ ત્રાસ વર્તાવ્યો

અમદાવાદ, શનિવાર

શહેરમાં ચોમાસાએ જમાવટ કરી હોઈ સ્વાભાવિકપણે મચ્છરોનો ઉત્પાત વધ્યો છે, જેના કારણે મચ્છરજન્ય રોગચાળાએ માથું ઊંચક્યું છે. આમ તો સમગ્ર અમદાવાદમાં સાદો મેલેરિયા, ઝેરી મેલેરિયા, ડેન્ગ્યુ અને ચિકનગુનિયાના ઓછા-વધતા કેસ મ્યુનિ. તંત્રના ચોપડે નોંધાયા છે, પરંતુ રામોલ-હાથીજણ, ગોમતીપુર, અમરાઈવાડી, વિરાટનગર- એમ કુલ આઠ વોર્ડનો સમાવેશ ધરાવતો શહેરનો પૂર્વ ઝોન મચ્છરજન્ય રોગચાળાનું હબ બન્યો છે. તેમાં પણ પૂર્વ ઝોનના નાગરિકો મેલેરિયા અને ડેન્ગ્યુના શિકાર બની રહ્યા હોઈ મ્યુનિ. હેલ્થ વિભાગ પણ ચિંતાતુર બન્યો છે.

મ્યુનિ. હેલ્થ વિભાગના મચ્છરજન્ય રોગચાળા અંગેના તા. ૧૭ જુલાઈ સુધીના સત્તાવાર રિપોર્ટ મુજબ અમદાવાદમાં મચ્છરજન્ય રોગચાળો વકર્યો છે. મચ્છરોનો ઉપદ્રવ ડામવા તેમજ રોગચાળાને વધુ ફેલાતો રોકવા માટે ગઈ કાલે હેલ્થ વિભાગ દ્વારા ૬૬૪ કન્સ્ટ્રક્શન સાઇટ તેમજ કોમર્શિયલ એકમો પૈકી ૪૦૨ એકમને નોટિસ ફટકારાઈ હતી. તંત્ર દ્વારા મચ્છરોના લારવા મળી આવતા છ એકમોને તાળાં પણ મરાયાં હતાં.