અમદાવાદથી ચોરેલું કેમિકલ ૨૮ જિંદગી ભરખી ગયું: હત્યાનો ગુનો દાખલ કરાયો

બુટલેગર્સે કેમિકલમાં સીધું પાણી ઉમેરી લોકોને દેશી દારૂના નામે પીવડાવી દીધું: ૧૩ કરતાં વધુ લોકો વિરુદ્ધ હત્યા અને કાવતરું રચવાની કલમો લગાવાઈ

અમદાવાદ, મંગળવાર

બોટાદ જિલ્લાના બરવાળાના રોજીદ ગામે ગઇ કાલે લઠ્ઠાકાંડમાં સર્જાયેલા મોતના તાંડવનો રેલો છેક અમદાવાદ સુધી પહોંચ્યો છે. પીપળજ ખાતે આવેલી ફેક્ટરીમાંથી ચોરાયેલા કેમિકલમાં પાણી ઉમેરી રોજીદ ગામના રહીશોને દેશી દારૂના નામે પીવડાવવામાં આવ્યું હતું, જેના કારણે ચારેય દિશામાં મોતનો માતમ સર્જાયો હતો. માત્ર ૬૦ હજાર રૂપિયા કમાવવાની લાલચમાં ખેલાયેલા આ ખેલમાં પોલીસ દ્વારા હવે ૧૩ કરતાં વધુ લોકો વિરુદ્ધ હત્યાનો ગુનો દાખલ કરવામાં આવ્યો છે. ચોરાયેલું કેમિકલ ૨૮ જિંદગી ભરખી ગયું છે ત્યારે મોતનો આંકડો વધે તેવી શક્યતાઓ પણ હાલ નકારી શકાતી નથી.

રોજીદ ગામ તેમજ આસપાસનાં ગામમાં દેશી દારૂ પીવાના શોખીન ગઇ કાલે અડ્ડા પર દારૂ પીવા ગયા હતા. ત્યારબાદ એક પછી લોકો જમીન પર ઢળી પડતાં ચારે તરફ હાહાકાર મચી ગયો હતો તેમજ મહિલા અને બાળકોના આક્રંદથી સમગ્ર ગામ દ્રવી ઊઠ્યું હતું. દેશી દારૂ પીવાના કારણે લઠ્ઠાકાંડ સર્જાતાં લોકોને સારવાર માટે નજીકની હોસ્પિટલમાં ખસેડવામાં આવ્યા હતા, જ્યાં એક પછી એક મોતનો ખેલ શરૂ થઇ ગયો હતો.