વરસાદી પાણી ઉલેચવાના તમામ ૭૫ પં૫ ૨૪ કલાક કાર્યરત રાખો

શાસકોએ ચોમાસામાં નાગરિકોને હાલાકી ન પડે તે માટે તંત્રને આદેશ આપ્યોઃ હજુ ૧૩ જગ્યાએ વરસાદી પાણી ઉલેચાઈ રહ્યાં છે

અમદાવાદ, શુક્રવાર

તાજેતરની ચોમાસાની સિઝનમાં મેઘરાજાના રૌદ્ર સ્વરૂપથી લોકો તોબા પોકારી ઊઠ્યા છે. ગત તા. ૧૦ જુલાઈ, રવિવારની સાંજથી પડેલા ભારે વરસાદ બાદથી અમદાવાદમાં સતત આ માહોલ જળવાઈ રહ્યો છે. શહેર આ વખતે અનેક વખત વરસાદના મારથી ઠેરઠેર જળબંબાકાર થતું રહ્યું છે. નીચાણવાળી સોસાયટીઓ અને બેઝમેન્ટમાં વરસાદી પાણીએ ઘૂસી જઈ હાહાકાર મચાવ્યો છે. લોકોની ઘરવખરી, દુકાનનો માલસામાન, ઓફિસનાં કમ્પ્યૂટર, લેપટોપ, સ્ટેશનરી વગેરેને નુકસાન થયું છે. આવા વખતે મ્યુનિ. તંત્ર દ્વારા વરસાદી પાણી ઉલેચવા માટે પંપને કામે લગાડાય છે, પરંતુ તમામ ૭૫ પંપ કાર્યરત સ્થિતિમાં જોવા મળ્યા નથી એટલે સ્ટેન્ડિંગ કમિટીના ચેરમેને તમામે તમામ પંપ ચાલુ હાલતમાં રાખવાનો તંત્રને આદેશ કર્યો છે.