તમારી સલામતી તમે જાણોઃ અમદાવાદમાં રોજનાં માત્ર ૪૫ રખડતાં ઢોર પકડાય છે

હાઈકોર્ટે ગંભીરતાથી લીધી હોવા છતાં સમસ્યા જેમતી તેમઃ ચોમાસામાં રસ્તા વચ્ચે બેસતાં રખડતાં ઢોર વાહનચાલકો માટે સૌથી મોટો ખતરો

અમદાવાદ, શનિવાર

શહેરીજનો ચોમાસાની પહેલા વરસાદના સંભવિત આતંકને લઈને ચિંતામાં મુકાઈ જાય છે અને જ્યારે વરસાદી ઋતુનાં મંડાણ થાય છે ત્યારથી રસ્તાઓની થતી દુર્દશા, તેમાં ઠેર ઠેર ભરાતાં પાણીને લઈને લોકો ત્રાહિમામ્ પોકારી ઊઠે છે. આ વખતે તો ચોમાસાએ અમદાવાદીઓને અનેક વાર રૌદ્ર સ્વરૂપ બતાડીને રીતસરના હેબતાવી દીધા છે. આકાશમાંથી ત્રાટકતી વરસાદી આફતની વચ્ચે લોકોને રખડતાં ઢોર નડે છે. રસ્તાની વચ્ચોવચ અડિંગો જમાવીને બેસતાં રખડતાં ઢોર હો કે પછી શાક માર્કેટમાં ફરતાં રખડતાં ઢોરને કારણે મહિલાઓ સહિતના લોકોને હંમેશાં ચાલતાં કે વાહન હંકારતા અધ્ધર શ્વાસે રહેવું પડે છે.

અમદાવાદમાં રખડતાં ઢોરના ત્રાસથી લોકોને છુટકારો મળતો નથી. ભાજપ પ્રદેશ પ્રમુખ સી. આર. પાટીલ પણ રખડતાં ઢોરના પ્રશ્નને જાહેરમાં ઉઠાવી ચૂક્યા છે. હાઈકોર્ટે રખડતાં ઢોરની સમસ્યાને વારંવાર ગંભીરતાથી લીધી છે.