મોંઘવારીનો ડબલ ડોઝઃ અદાણીએ બે દિવસમાં CNGમાં રૂ.૩.૪૮નો જંગી ભાવ વધારો ઝીંક્યો

૨ ઓગસ્ટે પ્રતિકિલોએ ૧.૯૯ રૂપિયાનો ભાવ વધારો કર્યા બાદ ફરી ૧.૪૯ રૂપિયાનો વધારો કર્યો: આજથી તમામ સીએનજી પમ્પ પર નવો ભાવ લાગુ

અમદાવાદ, ગુરુવાર

મોંઘવારીએ માજા મૂકી છે ત્યારે કોમ્પ્રેસ્ડ નેચરલ ગેસ એટલે કે સીએનજીના ભાવ સતત વધતાં હવે વાહનચાલકોને હાલાકીનો સામનો કરવો પડી રહ્યો છે. પેટ્રોલ અને ડીઝલ કરતાં સીએનજીનો ભાવ ઓછો હોવાના કારણે વાહનચાલકોની પહેલી પસંદ સીએનજી કાર હતી પરંતુ હવે તેનો ભાવ કૂદકેને ભૂસકે વધતાં વાહનચાલકો પણ વિચારે છે કે આવનારા દિવસમાં સીએનજીનો ભાવ પેટ્રોલ ડીઝલની તુલનામાં આવી જશે. બે દિવસમાં અદાણી સીએનજીનો ભાવ ૩.૪૮ રૂપિયા પ્રતિકિલોએ વધી ગયો છે. જેના કારણે આવનારા દિવસોમાં રિક્ષાનાં ભાડાંમાં ધરખમ વધારો થાય તેવી શક્યતાઓ છે.

કોરોના મહામારીના કારણે લોકો આર્થિક રીતે પાયમાલ થઇ ગયા બાદ ધીમેધીમે તેમની પરિસ્થિતિ પાટા પર ચઢી છે ત્યારે મોંઘવારીના મારે તેમને જકડી લીધા છે. સામાન્ય વર્ગ માટે એક સાંધે ત્યાં તેર તૂટે તેવી સ્થિતિ સર્જાઇ છે.