કોંગ્રેસનું હલ્લાબોલઃ રાહુલે કેન્દ્રની તુલના હિટલર સાથે કરી લોકતંત્રની હત્યા ગણાવી

કાળો કુરતો પહેરીને ખડગે સંસદમાં પહોંચ્યાઃ વડા પ્રધાન નિવાસને ઘેરાવ કરવાની યોજના

નવી દિલ્હી, શુક્રવાર

દેશમાં કમરતોડ મોંઘવારી અને રેકોર્ડબ્રેક બેરોજગારી વિરુદ્ધ કોંગ્રેસ આજે દેશવ્યાપી વિરોધ પ્રદર્શનો કરી રહી છે. જુદાં જુદાં રાજ્યોમાં કોંગ્રેસ શાસક પક્ષ સામે રસ્તા પર આવીને હલ્લાબોલ કરી રહી છે. પાટનગર દિલ્હીમાં એઆઈસીસી વડામથક ખાતે મોટી સંખ્યામાં કોંગ્રેસના સાંસદો, નેતાઓ અને કાર્યકરો એકત્ર થયા છે અને કોંગ્રેસ હેડક્વાર્ટરની બહાર મોંઘવારી અને બેરોજગારી વિરુદ્ધ વિરોધ પ્રદર્શન શરૂ કરી દીધું છે. હજારોની સંખ્યામાં કોંગ્રેસ કાર્યકરો આવી રહ્યા છે, પરંતુ પોલીસે બેરિકેડ લગાવીને દેખાવકારોને રોકી દીધા છે અને પોલીસ તેમજ કોંગ્રેસના કાર્યકરો વચ્ચે અથડામણ-સંઘર્ષ જારી છે.