મિશન ક્લીન સાબરમતીઃ ત્રણ દિવસમાં ૩૫૦ મેટિક ટન કચરો બહાર કઢાયો

ગાંધીબ્રિજ પાસે એક બોટ, સુભાષબ્રિજ પાસે એક બોટ અને નહેરુબ્રિજ તથા ફૂટ ઓવરબ્રિજ પાસે બે બોટને કામે લગાડાઈ છે. ચાર સ્કીપર બોટથી કચરો દૂર કરાઈ રહ્યો છે તો ત્રણ હીટાચી મશીનથી કચરો ઉલેચાઈ રહ્યો છે. આગામી દિવસોમાં વાસણા બેરેજની આસપાસથી કચરાનો નિકાલ કરાશે

અમદાવાદ, બુધવાર

આપણા શહેરની વચ્ચોવચ થઈને વહેતી સાબરમતી નદી અમદાવાદને પૂર્વ અને પશ્ચિમ અમદાવાદ એમ બે ભાગમાં વહેંચી કાઢે છે. જોકે સાબરમતી નદીના તટ પર વસેલા લાખો અમદાવાદીઓની શ્રદ્ધાનું કેન્દ્ર તો નદી જ રહી છે. જોકે સાબરમતી નદી દેશની સૌથી પ્રદૂષિત નદીઓ પૈકીની એક નદી બની ગઈ છે. જો સાબરમતી નદીના બંને કાંઠા મ્યુનિ. તંત્રના કરોડો રૂપિયાના રિવરફ્રન્ટ પ્રોજેક્ટથી નયનરમ્ય બન્યા છે તો આ પ્રોજેક્ટ એરિયામાં થઈને વહેતી નદી પર તરતા કચરાને કારણે તે ગંદી પણ બનતી રહે છે. જોકે મ્યુનિ. સત્તાવાળાઓ સમયાંતરે નદીમાં વહેતા કચરા તેમજ વેલ-લીલ કાઢવાના પ્રયાસ કરે છે. છેલ્લા ત્રણ દિવસથી તંત્રે નવેસરથી 'ક્લીન સાબરમતી' અભિયાને જોરશોરથી હાથ ધર્યું છે, જે અંતર્ગત અત્યાર સુધીમાં ૩૫૦ ટન કચરો નદીમાંથી બહાર કાઢીને તેને પીરાણાની ડમ્પસાઇટ પર ઠાલવી દેવાયો છે.