લઠ્ઠાકાંડ ઈફેક્ટઃ દારૂનો ધંધો છોડી બુટલેગર્સે જુગારના અડ્ડા શરૂ કર્યા

એરપોર્ટ પોલીસે લિસ્ટેડ બુટલેગર્સને જુગાર રમતા રંગે હાથ ઝડપી લીધા: શ્રાવણ મહિનામાં પોલીસને દારૂ કરતાં જુગારના કેસ કરવામાં વધુ રસ હોય છે

અમદાવાદ, ગુરુવાર

જે વ્યક્તિને ગુનાખોરીના શોર્ટકટથી રૂપિયા કમાવવાની આદત પડી ગઇ હોય તે મહેનત કરીને ગુજરાન ચલાવી શકતી નથી. શાતિર અપરાધીઓ માટે ગુનાખોરીનો એક રસ્તો બંધ થઇ જાય તો બીજો રસ્તો આપમેળે ખૂલી જતો હોય છે. થોડા દિવસ પહેલાં ડુપ્લિકેટ ચીજવસ્તુઓની હરાજીનો ધંધો બંધ થઇ જતાં પોલીસનો એક બાતમીદા૨ ડ્રગ્સ માફિયા બની ગયો હતો ત્યારે હવે સરદારનગર વિસ્તારમાં દારૂનો ધંધો પોલીસે બંધ કરાવી દેતાં બે બુટલેગર્સે જુગારની ક્લબ ચાલુ કરી દીધી હતી. ગઇ કાલે એરપોર્ટ પોલીસે જુગારનો કેસ દાખલ કર્યો હતો. જેમાં બે બુટલેગર સહિત ત્રણ લોકોની ધરપકડ કરી છે.