SMCનો સપાટો: રખિયાલમાંથી ૨૨ લાખની કિંમતનો ૧૮૯૫૯ બોટલ દારૂનો જથ્થો જપ્ત

વિદેશમાં બેસીને વિનોદ સિંધી દારૂનું નેટવર્ક ગુજરાતમાં ચલાવતો હોવાનો પર્દાફાશઃ કુખ્યાત બંસી પણ જેલમાંથી બહાર આવીને ફરીથી એક્ટિવ થયો

અમદાવાદ, શનિવાર

ગુજરાતમાં થયેલા લઠ્ઠાકાંડ ઉર્ફે કેમિકલકાંડ બાદ પણ બુટલેગર સુધરવાનું નામ નથી લેતા અને બિનધાસ્ત પોલીસના ડર વગર લાખો રૂપિયાનો દારૂ અમદાવાદમાં ઉતારી રહ્યા છે. કેટલાક ભ્રષ્ટ પોલીસ કર્મચારીની રહેમનજર હેઠળ બુટલેગર બેફામ બન્યા છે. જેના કારણે ઠેરઠેર જોઇએ તે બ્રાન્ડનો દારૂ વેચાવા લાગ્યો છે. એક તરફ ભ્રષ્ટ પોલીસ કર્મચારીની ફોજ દારૂનો ધંધો કરવા માટે બુટલેગર્સને પરિમશન આપી રહી છે ત્યારે સ્ટેટ મોનિટરિંગ સેલમાં ફરજ બજાવતા જાંબાજ પોલીસ કર્મચારી બુટલેગર્સની આશા પર પાણી ફેરવી રહ્યા છે. સ્ટેટ મોનિટરિંગ સેલે મોડી રાતે રખિયાલ વિસ્તારમાંથી ૨૨ લાખ રૂપિયાના દારૂનો જથ્થો ઝડપી પાડ્યો છે. ગુજરાતના ટોચના બુટલેગર્સ જેલમાં હોવાના કારણે દારૂના ધંધામાં પોતાની સલ્તનત જમાવનાર બંસી વધુ એક વખત ‘રઇસ’ બનવા નીકળ્યો છે.