ચોમાસાની વિદાય માટે થોડી રાહ જોવી પડશેઃ રાજ્યમાં રર-ર૩ સપ્ટેમ્બરે વરસાદ પડી શકે છે

દક્ષિણ ગુજરાત અને સૌરાષ્ટ્રમાં સામાન્યથી ભારે વરસાદની શક્યતાઃ આગામી ચાર દિવસ કેટલાક જિલ્લામાં વરસાદી માહોલ રહેશે

અમદાવાદ, મંગળવાર

આ વર્ષે ભાદરવામાં પણ ભરપૂર વરસાદ ખાબક્યો છે. આ વર્ષે ચોમાસાએ મન મૂકીને ભીંજાવ્યા છે. રાજ્યમાં સર્વત્ર મેઘમહેર વચ્ચે નદી-નાળાં ઓવરફ્લો થયાં છે. હાલમાં અમદાવાદ સહિત રાજ્યભરમાં દિવસમાં ગરમી અને વહેલી સવારના સમયે ઠંડું વાતાવરણ થતાં મિશ્ર ઋતુનો અનુભવ થઈ રહ્યો છે ત્યારે હવામાન વિભાગે હજુ પણ વરસાદ યથાવત્ રહેશે તેવા સંકેત આપ્યા છે, જેના કારણે ખેડૂતોની ચિંતા વધી ગઈ છે. હવામાન વિભાગની આગાહી મુજબ દક્ષિણ ગુજરાત અને સૌરાષ્ટ્રમાં સામાન્યથી ભારે વરસાદની શક્યતા છે એટલું જ નહીં, આગામી ચાર દિવસ રાજ્યના કેટલાક જિલ્લામાં વરસાદી માહોલ રહેશે.