આજે શક્તિ આરાધનાનો શ્રેષ્ઠ દિવસ હવનાષ્ટમી: ઠેરઠેર હવનનાં આયોજન

મંદિરોમાં ભક્તોની ભીડઃ છેલ્લાં બે નોરતાંમાં મન મૂકીને ગરબે રમવા ખેલૈયાઓનો ઉત્સાહ સાતમા આસમાને

અમદાવાદ, સોમવાર

શક્તિની આરાધનાના પાવન પર્વ નવરાત્રીના હવે ફક્ત બે દિવસ જ બાકી છે. ભક્તો માટે નવરાત્રી માતાજીની પૂજા-અર્ચના કરવાનો જ્યારે ખેલૈયાઓ માટે મન મૂકીને ગરબે રમવાનો અવસર છે. આજે આસો મહિનાની શુક્લ પક્ષની અષ્ટમી એટલે કે દુર્ગાષ્ટમીનો પવિત્ર દિવસ છેઉલ્લેખનીય છે કે, પરમેશ્વરી શક્તિસ્વરૂપા જગદંબા મા પાર્વતીનાં વિવિધ પ્રાગટ્ય સ્વરૂપની નવલી નવરાત્રિના નવે નવ દિવસ દરમિયાન આરાધના થાય છે. સમગ્ર નવરાત્રિનાં અનુષ્ઠાન સંદર્ભે આજના દિવસે હવન કરવાનું ખૂબ જ મહત્ત્વ છે. ગુજરાતમાં તો શક્તિપીઠ અંબાજી સહિતનાં મોટા મંદિરોમાં આજના દિવસે વિશેષ હવન યોજાય છે અને માતાજીને વિવિધ ભોગ ધરાવવામાં આવે છે.