ડાયાબિટીસના દર્દીઓએ આ ખાસ જાણવું જોઈએ

દુનિયાભરના ડાયાબિટીસના દર છ દર્દીમાંથી એક ભારતનો

આજની દોડધામભરી જિંદગીમાં લાઈફસ્ટાઈલ ડિસીઝ થવા એ સૌથી મોટું જોખમ છે. એમાં પણ ડાયાબિટીસ તો અનેક રોગનું મૂળ અને શરીરને અંદરથી સાવ ખતમ કરી દેતી ગંભીર બીમારી છે એવું કહીએ તો પણ અતિશયોક્તિ નથી જ. આંકડાઓ જોઈએ તો, દુનિયાભરના ડાયાબિટીસના દર છ દર્દીમાંથી એક ભારતનો હોય છે. ભારતમાં અંદાજે આઠ કરોડથી વધુ વયસ્કો હાલ ડાયાબિટીસથી પીડાય છે. પાડોશી ચીન આ મામલે ભારત કરતાં પણ આગળ છે, જ્યાં અંદાજે ૧૧.૫ કરોડ લોકો ડાયાબિટીસથી ગ્રસ્ત છે. સાવ સામાન્ય શબ્દોમાં સમજીએ તો, લોહીમાં રહેલા ગ્લુકોઝને પચાવી શકવાની અક્ષમતાને કારણે લોહીમાં ગ્લુકોઝનું પ્રમાણ જરૂરી સામાન્ય સ્તર કરતાં સતત ઊંચું રહે તો તેને ડાયાબિટીસ મેલિટસ કહેવાય છે. આ અક્ષમતા અપૂરતા ઇન્સ્યુલિન સ્ત્રાવ કે ઇન્સ્યુલિનના ખામીભર્યા કાર્યને કારણે થાય છે. કેટલાક કિસ્સાઓમાં તો આ બંને કારણો જવાબદાર હોય છે.