અમદાવાદમાં તાપમાનનો પારો ૪૦ ડિગ્રીએ પહોંચશેઃ આકરી ગરમી માટે તૈયાર રહેજો

આવતા સપ્તાહે ફરીથી રાજ્યભરમાં કમોસમી વરસાદની આગાહીથી ખેડૂતોમાં ચિંતા પ્રસરી

અમદાવાદ, શનિવાર

અમદાવાદ સહિત રાજ્યભરમાં ગરમીનો પારો ઊંચાઈએ જઈ રહ્યો છે ત્યારે હજુ પણ મહત્તમ તાપમાનનો પારો ઉપર જવાની આગાહી હવામાન વિભાગે કરી છે. તેથી અમદાવાદીઓએ હજુ આકરી ગરમી સહેવાની તૈયારી રાખવી પડશે તો સાથે-સાથે વેસ્ટર્ન ડિસ્ટર્બન્સની અસરના કારણે રાજ્યના હવામાનમાં પલટો આવવાની સંભાવના પણ હવામાન વિભાગે વ્યક્ત કરી છે. એક તરફ આકરી ગરમી તો રાજ્યના કેટલાક વિસ્તારોમાં કમોસમી વરસાદ થવાની શક્યતા પણ છે. તાજેતરમાં વાદળછાયું વાતાવરણ રહેતાં ગરમીમાં ઘટાડો થયો હતો, પરંતુ રાજ્યનું સરેરાશ મહત્તમ તાપમાન ફરી એક વાર ૩૮ ડિગ્રી સેલ્સિયસ પર પહોંચી ગયું છે.