કાલથી ધો.૧૦-૧૨ની બોર્ડ પરીક્ષાનો પ્રારંભઃ બેઠક વ્યવસ્થા જોવા વિધાર્થીઓ કેન્દ્ર પર ઊમટી પડ્યા

રાજ્યનાં ધોરણ-૧૦માં ૯.૫૦, ધોરણ-૧૨ વિજ્ઞાન પ્રવાહમાં ૧.૧૦ અને સામાન્ય પ્રવાહમાં ૫.૬૫ લાખ વિધાર્થી પરીક્ષા આપશે

અમદાવાદ, સોમવાર

ગુજરાત માધ્યમિક અને ઉચ્ચતર માધ્યમિક શિક્ષણ બોર્ડની ધોરણ ૧૦ અને ૧૨ની પરીક્ષાનો આવતી કાલથી પ્રારંભ થઇ રહ્યો છે. આજે વિદ્યાર્થીઓ પોતાનો પરીક્ષા ખંડ-નંબર જોવા માટે શાળામાં ઊમટી પડયા હતા ત્યારે શિક્ષણ બોર્ડ દ્વારા તમામ તૈયારીને આખરી ઓપ અપાઇ ગયો છે. અમદાવાદ શહેર અને ગ્રામ્યમાંથી ૧.૯૧ લાખથી વધુ વિદ્યાર્થી પરીક્ષા આપી રહ્યા છે. શહેરનાં ૩૭૦ કેન્દ્રમાં ધો.૧૦ના ૬૧,૪૭૫ ધો. ૧૨ વિજ્ઞાન પ્રવાહના ૯,૪૨૦ જ્યારે કોમર્સના ૩૭,૪૯૧ વિદ્યાર્થી પરીક્ષા આપશે આપશે. વિદ્યાર્થીની સાથે અમદાવાદની સાબરમતી સેન્ટ્રલ જેલના ૫૯ કેદી પૈકી ૩૭ કેદી ધોરણ ૧૦ની અને ૨૨ કેદી ધોરણ ૧૨ની પરીક્ષા આપશે. રાજ્યના ધોરણ-૧૦માં ૯.૫૦ લાખ ધોરણ-૧૨વિજ્ઞાન પ્રવાહમાં ૧.૧૦ લાખ અને સામાન્ય પ્રવાહમાં ૫.૬૫ લાખ વિદ્યાર્થી પરીક્ષા આપશે.