ઈમરાન ખાન પર ‘મહાપ્રહાર'ની તૈયારીઓ: એકસાથે ૪૦૦ પોલીસકર્મીની ટીમ ત્રાટકશે

અલ્ટિમેટમની મુદત પૂર્ણ થતાં હવે કોઈ પણ ક્ષણે ઈમરાનના ઘર પર પોલીસ એક્શન

લાહોર, શુક્રવાર

પાકિસ્તાનમાં આજે કંઈક મોટું થવાનાં એંધાણો મળી રહ્યાં છે. પાકિસ્તાન તહરિક-એ-ઈન્સાફ (પીટીઆઈ) પાર્ટીના અધ્યક્ષ અને પૂર્વ વડા પ્રધાન ઈમરાન ખાનના જમાન પાર્ક સ્થિત નિવાસસ્થાન પર હવે ગમે તે ઘડીએ પોલીસ એક્શન શરૂ થઈ શકે છે. પંજાબ પ્રાંતની વચગાળાની સરકારે બુધવારે ઈમરાન ખાનને ૨૪ ક્લાકનું અલ્ટિમેટમ આપ્યું હતું કે જે ૪૦ આતંકીઓને ઈમરાન ખાને પોતાના નિવાસસ્થાનમાં આશ્રય આપ્યો છે તેમને પોલીસના હવાલે કરી દે. હવે આ ડેડલાઈન સમાપ્ત થઈ ચૂકી છે. પોલીસે ઈમરાનના નિવાસસ્થાનને ચોમેરથી કોર્ડન કરી લીધું છે. હવે ઈમરાન ખાન પર ‘મહાપ્રહાર’ કરવાની તૈયારીઓ થઈ ચૂકી છે. એકસાથે ૪૦૦ જેટલા પોલીસકર્મીઓની ટીમ ઈમરાનના નિવાસસ્થાન પર ગમે તે ઘડીએ ત્રાટકી શકે છે.