બાળકો રમવાના મામલે બબાલઃ પાડોશીએ ફેંટ મારતા વૃદ્ધાનું મોત

શહેરકોટડા પોલીસે મહિલા અને તેના દિયર વિરુદ્ધ હત્યાનો ગુનો દાખલ કર્યો

અમદાવાદ, શનિવાર

શહેરના સરસપુર વિસ્તારમાં રથયાત્રાની હાલ તડામાર તૈયારીઓ ચાલી રહી છે ત્યારે મોડી રાતે બાળકો રમવાના મામલે એક વૃદ્ધાની હત્યા થઈ જતાં ચકચાર મચી ગઇ છે. બંને પરિવારે સામસામે મારામારી કરી હતી, જેમાં વૃદ્ધાને વધુ ઇજા થતાં તેમનું સારવાર દરમિયાન મોત થયું છે. મોડી રાતે બાળકો ૨મી રહ્યાં હતાં ત્યારે મામલો બીચક્યો હતો. શહેરકોટડા પોલીસે વૃદ્ધાની હત્યા કરનાર મહિલા અને તેના દિયરની ધરપકડ કરી છે.

વાવાઝોડાના બિપરજોય કારણે શહેરમાં ઠેરઠેર વરસાદ પડી રહ્યો હતો, જેના કારણે લોકો વરસાદમાં મન મૂકીને નાહ્યા હતા, જ્યારે બાળકોએ વરસાદમાં પલળતાં તોફાન-મસ્તી કરી હતી. ગઇ કાલે બાળકો રમતાં હતાં ત્યારે એક વૃદ્ધાની હત્યા થઇ હોવાની ઘટના સામે આવી છે. સરસપુર વિસ્તારમાં આવેલી શારદાબહેન હોસ્પિટલની બાજુમાં મંગલ પ્રભાત સોસાયટી આવેલી છે, જ્યાં ૬૪ વર્ષીય સવિતાબહેન રહે છે, જેમની મોડી રાતે હત્યા થઇ છે.