અમદાવાદીઓ આખું અઠવાડિયું હળવા વરસાદ માટે તૈયાર રહેજો

આજે સુરત, ભરૂચ અને ગીર-સોમનાથમાં ભારે વરસાદ પડવાની શક્યતાઃ ઉમરગામમાં ર૪ કલાકમાં છ ઈચ વરસાદ

અમદાવાદ, સોમવાર

શહેરીજનોમાં છેલ્લા બે દિવસથી વરસાદને લઈ ચર્ચાઓ થઈ રહી છે. ખાસ કરીને રાજ્યના અનેક વિસ્તારમાં મેઘરાજાની કૃપા થઈ હોઈ હવે અમદાવાદમાં ક્યારે વરસાદ પડે છે તેના માટે લોકોમાં ઉત્સુકતા જોવા મળી રહી છે. રાજકોટ, બોટાદ, અમરેલી વગેરે વિસ્તારમાં મેઘરાજા ધમાકેદાર વરસ્યા છે. ચોમાસાનાં મંડાણ થઈ ગયાં હોઈ અમદાવાદમાં આજથી આખા અઠવાડિયા સુધી હળવો વરસાદ પડી શકે તેમ છે. સ્થાનિક હવામાન વિભાગની આગાહી મુજબ શહેરમાં સાત દિવસ સુધી વરસાદી માહોલ છવાશે. દરમિયાન સવારના ૧૧ વાગ્યાના સુમારે પશ્ચિમ અમદાવાદના એસ.જી. હાઇવે, રાણીપ, ન્યૂ રાણીપ, ગોતા અને સોલા સહિતના વિસ્તારમાં વરસાદ થવાના અહેવાલ મળી રહ્યા છે.