લોન અપાવવાના બહાને ગઠિયાઓએ યુવતી પાસેથી ૧.૨૩ લાખ પડાવી લીધા

ક્વિક મની એપ્લિકેશનથી યુવતીએ પહેલાં લોન લીધી, ત્યાર બાદ વ્યાજ સાથે ભરપાઈ કરી દીધી

અમદાવાદ, મંગળવાર

સોશિયલ મીડિયા દિવસે દિવસે જેટલું ઉપયોગી બની રહ્યું છે તેના કરતાં દસ ગણું ખતરનાક પણ બની રહ્યું છે. થોડા રૂપિયાની લાલચમાં આજે ગઠિયાઓ નિર્દોષ લોકો સાથે સાયબર ફ્રોડ કરતાં સહેજ પણ અચકાતા નથી, જેના પુરાવા હજારોની સંખ્યામાં સાયબર ક્રાઇમ પોલીસ સ્ટેશનમાં ભરીને પડ્યા છે. રોજ અલગ અલગ મોડસ ઓપરેન્ડીનો ઉપયોગ કરીને ગઠિયાઓ સાયબર ક્રાઇમની ઘટનાને અંજામ આપી રહ્યા છે, જેના કારણે ઘણા લોકોને પરિવાર તેમજ મિત્રવર્તુળમાં બદનામ થવાના દિવસો આવી ગયા છે. સરખેજમાં રહેતી પરિણીત યુવતી પાસેથી લોન આપવાના બહાને ૧.૨૩ લાખ પડાવી લીધા હોવાની ઘટના સામે આવી છે. યુવતીને પહેલાં થોડી થોડી લોન આપ્યા બાદ બીજી લોન માટે રૂપિયા ભરવા પડશે તેવું કહીને ગઠિયાઓએ ચીટિંગ આચર્યું છે.