હિમાચલ પ્રદેશઃ ચાર દિવસમાં ૩૯ લોકોએ જીવ ગુમાવ્યા

૧૧૦૦થી વધુ રસ્તા બંધ, સેંકડો પ્રવાસીઓ ફસાયા

શિમલા, ગુરુવાર

ઉત્તર ભારતમાં આકાશી આફત બંધ થવાનું નામ લઇ રહી નથી. પહેલાં ગરમી અને હવે અતિ વરસાદથી લોકો ત્રાહિમામ્ પોકારી ગયા છે. છેલ્લા ૨૪ કલાકમાં હિમાચલ પ્રદેશ, દિલ્હી, પંજાબ અને હરિયાણામાં વરસાદમાં ઘટાડો થયો છે પરંતુ વરસાદ પછી ઊભી થયેલી આફતમાં ઘટાડો થયો નથી. જ્યારે ઉત્તરાખંડ, ઉત્તર પ્રદેશ અને મધ્ય પ્રદેશમાં ભારે વરસાદ થયો છે. હિમાચલમાં ૭થી૧૧ જુલાઈ દરમિયાન સામાન્ય કરતા ૪૩૬% વધુ વરસાદને કારણે ૪૦ પુલ તણાઈ ગયા છે. હિમાચલમાં ૫૦ હજાર લોકોને સુરક્ષિત રીતે બહાર કાઢવામાં આવ્યા છે. જેમાં ૨૫ હજાર લોકો કુલ્લુ-મનાલીમાં ત્રણ દિવસથી ફસાયેલા હતા. ચંડીગઢમાં ભારે વરસાદને કારણે અનેક રસ્તાઓ ધોવાઈ ગયા અને પાણી પુરવઠાને અસર થઈ છે.