બુટલેગર ખુદ રૂ. ૧૭ લાખનો દારૂ ભરેલી ટ્રક લઈને આવ્યો અને ક્રાઇમ બ્રાંચની ટીમ ત્રાટકી

ઓઢવના શ્રીરામ એસ્ટેટમાં દરોડોઃ દારૂ મંગાવનાર મુખ્ય સૂત્રધાર ફરાર, દારૂ લેવા આવનાર બે બુટલેગર ઝડપાયા

અમદાવાદ, ગુરુવાર

દારૂબંધીના કડક કાયદાના અમલીકરણ બાદ પણ અમદાવાદ સહિત ગુજરાતમાં બિનધાસ્ત દારૂનો ધંધો ચાલી રહ્યો છે. બુટલેગર અલગ અલગ મોડસ ઓપરેન્ડી વાપરીને રોજ લાખો, કરોડો રૂપિયાનો દારૂ રાજસ્થાન, મહારાષ્ટ્ર તેમજ મધ્યપ્રદેશથી લાવી રહ્યા છે. કેટલાક બુટલેગર દારૂ લાવવામાં સફળ થઇ જાય છે ત્યારે કેટલાક બુટલેગર પોલીસ તેમજ એજન્સીઓના હાથે ઝડપાઇ જાય છે. એક તરફ સ્ટેટ મોનિટરિંગ બુટલેગરના ઇરાદા પર પાણી ફેરવી રહ્યું છે ત્યારે હવે અમદાવાદ ક્રાઇમ બ્રાંચ પણ મેદાનમાં આવી છે. અમદાવાદ ક્રાઇમ બ્રાંચે ગઇ કાલે ૧૭ લાખના દારૂના જથ્થા સાથે બે આરોપીની ધરપકડ કરી છે. સોનીની ચાલી પાસે દારૂ ભરેલી ટ્રક આવી હતી. જે ખાલી થાય તે પહેલાં ક્રાઇમ બ્રાંચ ફિલ્મી સ્ટાઇલથી ત્રાટકી હતી. ક્રાઇમ બ્રાંચે કુલ ૪૪૮૮દારૂની બોટલ જપ્ત કરી છે જ્યારે અમદાવાદમાં ક્યા ક્યા બુટલેગરને દારૂનો જથ્થો આપવાનો હતો તે શોધવા માટે ચક્રો ગતિમાન કર્યાં છે. ક્રાઇમ બ્રાંચે કુલ ૨૭ લાખથી વધુનો મુદ્દામાલ જપ્ત કરીને વધુ કાર્યવાહી હાથ ધરી છે.