કાચું સોનું આપવાના બહાને ભૂજની ગેંગે વેપારી સાથે રૂ. ૮૫ લાખની ઠગાઈ કરી

આરોપીઓએ કે.વી. એન્ટરપ્રાઇઝ નામની આંગડિયા પેઢીમાં રૂપિયા જમા કરાવવા માટે વાત કરી હતી

અમદાવાદ, મંગળવાર

કાચું સોનું આપવાના બહાને ગોલ્ડના વેપારીઓ સાથે કરોડો રૂપિયાની ઠગાઇ કરતી ટોળકીનો આતંક જોવા મળ્યો છે. ઘોડાસરના ગોલ્ડના વેપારીને કાચું સોનું આપવાના બહાને ૧.૩૫ કરોડ રૂપિયાની ઠગાઇ કરી હતી, જોકે યેનકેન રીતે વેપારીએ ૫૦ લાખ તો પરત મેળવી લીધા હતા, પરંતુ હજુ સુધી ૮૫ લાખ રૂપિયા ગઠિયાઓ પાસે રહેતાં અંતે પોલીસ ફરિયાદ કરી છે. ભૂજની ગેંગની મોડસ ઓપરેન્ડી જોઇને ખુદ પોલીસ પણ ગોઠે ચઢી હતી. કચ્છ અને ભૂજમાં આ ગેંગનો એટલો આતંક છે કે જેના કારણે મહિને એકાદ-બે ગોલ્ડના વેપારીઓ ફરિયાદ નોંધાવે છે.