નામ પૂરતી ચલાવાતી ડમી સ્કૂલો સામે શિક્ષણ વિભાગની લાલ આંખઃ કડક કાર્યવાહી કરાશે

હાજરી સુનિશ્ચિત કરવા વિભાગની તાકીદ: બોર્ડના આદેશથી જિલ્લા શિક્ષણાધિકારીએ ટીમ મેદાનમાં ઉતારી

અમદાવાદ, શુક્રવાર

જિલ્લા શિક્ષણાધિકારીએ શહેરની ડમી શાળાઓ સામે લાલ આંખ કરીને આકસ્મિક તપાસ શરૂ કરી દેતાં વિદ્યાર્થીઓ, વાલીઓ અને શાળા સંચાલકોમાં ફફડાટ પેસી ગયો છે. કોચિંગ ક્લાસમાં અભ્યાસ કરતા વિદ્યાર્થીઓએ શાળામાં હાજરી આપવા આવવું ન પડે તેવી સુવિધા કેટલીક શાળાએ શરૂ કરી છે, જેમાં સ્કૂલમાં વિદ્યાર્થીનું નામ માત્ર ચોપડે બોલે છે, પરંતુ ખરેખર તે એ જ સમયમાં કોચિંગ કલાસમાં અભ્યાસ કરતો હોય છે. ખાસ કરી ધોરણ-૧૧ અને ૧૨ સાયન્સના વિદ્યાર્થીઓ મોટા ભાગનો સમય કોચિંગ ક્લાસમાં જતા હોવાથી આવી ડમી શાળામાં પ્રવેશ મેળવી લે છે અને શાળામાં ભણવા જવાનું ટાળે છે, જેથી બોર્ડના આદેશ બાદ આવી શાળા સામે કડક કાર્યવાહી શરૂ કરવામાં આવી છે.