૧૦ દિવસ બાદ ગુજરાતમાં ફરી વરસાદની એન્ટ્રી

બુધ-ગુરુ-શુક્ર એમ ત્રણ દિવસ ડાંગ, તાપી, તવસારી, વલસાડ, દમણ, દાદરાનગર હવેલીને મેઘરાજા ધમરોળશે

જગત જનની મા જગદંબાની નવલી નવરાત્રિના દિવસો નજીક આવતા જાય છે. આગામી તા. ૩ ઓક્ટોબરથી નવરાત્રિ ઉત્સવ શરૂ થવાનો છે, જોકે અમદાવાદ સહિત રાજ્યમાં વરસાદને લગતું ચિત્ર સ્પષ્ટ થતું નથી. ક્યારેક ચોમાસાએ વિદાય લીધી હોય તેવું લાગે છે તો ક્યારેક છૂટાછવાયાં ઝાપટાં પડે છે. જોકે ગઈ કાલે તો ગુજરાતમાં ફરી વરસાદે એન્ટ્રી લીધી હોઈ તેવી ચર્ચાએ વેગ પકડ્યો છે.

રાજ્યમાં ચોમાસું વિદાય લે તે પહેલાં કેટલાક વિસ્તારોમાં ફરીથી ભારે વરસાદની સ્થિતિ જોવા મળી શકે છે. આગામી દિવસોમાં બંગાળની ખાડીમાં એક સિસ્ટમ સર્જાવાની છે. તેની અસર ગુજરાત પર થશે. જોકે ગઈ કાલે દક્ષિણ ગુજરાતના કેટલાક જિલ્લા, ગીરનું જંગલ અને મધ્ય ગુજરાતમાં વરસાદનું આગમન થયું હતું. ભારે ઉકળાટથી ત્રસ્ત લોકોએ વરસાદને વધાવી લીધો હતો.