મિશન 31st:ડ્રગ્સ-દારૂતી હેરફેર રોકવા પોલીસે એક્શનનું એક્સિલેટર દબાવ્યું

ડ્રગ્સ ડીલર્સ-બુટલેગર્સ સહિતના ગુનેગારોને ઝડપી પાડવા પોલીસ ઉપરાંત સુરક્ષા એજન્સીઓ પણ મેદાનમાં

‘મિશન 31st’આ શબ્દનો મતલબ પોલીસની સુનામી છે, જે આવનારા દિવસોમાં જોવા મળશે. ૩૧ ડિસેમ્બર વર્ષ ૨૦૨૪નો છેલ્લો દિવસ છે એટલે કેટલાંક યંગસ્ટર્સ તેને બાય બાય કરવા અને વર્ષ ૨૦૨૫ને આવકારવા માટે ડ્રગ્સદારૂ તેમજ હુક્કા પાર્ટીનું આયોજન કરતાં હોય છે, જેમને રોકવા પોલીસે મિશન 31st શરૂ કર્યું છે. યંગસ્ટર્સને રીઝવવા માટે બુટલેગર્સ-ડ્રગ્સ માફિયા એક મહિના પહેલાંથી તૈયારીઓ કરી લેતા હોય છે, જેમને રોકવા માટેનું ખાસ અભિયાન પોલીસ તેમજ તમામ સુરક્ષા એજન્સીઓએ કરી લીધું છે. ક્રિસમસનો તહેવાર શરૂ થાય એટલે યંગસ્ટર્સ પાર્ટી કરવાના મૂડમાં હોય છે ત્યારે આ તહેવારમાં બુટલેગર્સ અને ડ્રગ્સ માફિયા તગડા રૂપિયા કમાતા હોય છે. યંગસ્ટર્સ માટે બુટલેગર્સ અને ડ્રગ્સ માફિયાઓ નવેમ્બર મહિનાથી તૈયારીઓ શરૂ કરી દેતા હોય છે.

ડ્રગ્સ માફિયાઓ ગાંજો, એમડી, હેરોઇન, કોકેન, ચરસ સહિતના ડ્રગ્સનો સંગ્રહ કરતા હોય છે, જ્યારે બુટલેગર્સ દારૂનો જથ્થો એકત્રિત કરતા હોય છે. ગુનેગારો પોતાનો ઇરાદો પાર પાડે નહીં તે માટે સ્ટેટ મોનિટરિંગ સેલ, ક્રાઇમ બ્રાંચ, પ્રીવેન્શન ઓફ ક્રાઇમ બ્રાંચ, લોકલ ક્રાઇમ બ્રાંચ, સ્થાનિક પોલીસ એડીચોટીનું જોર લગાવતાં હોય છે. હાલ ડ્રગ્સ અને દારૂની હેરફેરને રોકવા માટે પોલીસે પોતાની એક્ટિવિટીનું એક્સિલેટર જોરથી દબાવી દીધું છે.